ORANJESTAD (AAN): Parlamentario Endy Croes a tuma nota cu net AVP awe kier crea un stigma riba e fam Croes cu expresionnan cu tin (3) Croes cu lo bira Minister den e proximo Gabinete Wever - Croes 2.
Ta sinti cu AVP no tin argumento y awor kier crea odio den pueblo riba e fam Croes. ( Gerlien Croes watchout!)
/// Den aña 90 AVP tabata tin (3) Minister di Fam Croes:
Pa esnan di AVP cu no sa historia y kier crea polemica riba Fam Croes den proximo gobierno nos mester recordanan lo siguiente. Na promer lugar nos a caba di pasa den un proceso electoral democratico.
Pueblo a escohe MEP como e Partido mas grandi di Aruba derotando AVP. AVP a perde 15 mil voto den ultimo dos eleccion. Esaki mester bisa hopi di e partido AVP. Mientras cu MEP no solamente a gana eleccion como e Partido mas grandi cu mas di 20 mil voto pero Evelyn Wever Croes Lider di MEP a sali “vote getter” di pais Aruba cu 7518 voto y ta bay den historia como e promer “vote getter” femenino di Aruba.
Akinan tambe Mike Eman a ricibi un otro derota. Pues AVP a haña dos derota den un solo elecion 25 di Juni ultimo. Awor pa nos relata poco mas na historia nos mester recorda pueblo cu den decada 90 desde 1993 pa 2001 AVP tabata den gobierno. AVP e tempo aya tabata tin (3) candidato di fam Croes riba nan lista kendenan tambe a bira Minister den Gabinete Henny Eman.
Tanto Tico Croes, Eddy Croes y Mito Croes (def) tabata ministernan di AVP di fam Croes durante gabinete Henny Eman. Pues ban laga weganan infantiel un banda. Ora ta cumbini AVP, nan kier alsa Croes y usanan y ora No ta cumbini AVP, nan kier crea polemica rond di faam Croes.
Aruba ta un isla chiquito y realidad di bida ta cu tin masha hopi hende cu e fam Croes. Tico Croes por ehempel a wordo sacrifica pa AVP momento e tabata creciendo. Nos ta corda AVP tabata tin Chibi Croes tambe como Lider y tur esaki ta ancra den historia.
Awe AVP tin Gerlien Croes riba lista. (watch out!). Betico Croes e ehempel di un estadista cu a educa su pueblo cu un amor grandi pa Bo patria. Laga nos usa e bon ehempel aki pa traha pa e pais sin fomenta odio y rabia.
