Parlamentario Evelyn Wever-Croes:
ORANJESTAD (AAN): Diamars mainta a tuma luga e apertura di Aña Parlamentario 2026-2027. Manera cu ley ta prescribi, SE Gobernador Alfonso Boekhoudt a duna un discurso pa habri Aña Parlamentario.
Parlamentario Evelyn Wever-Croes di Fraccion di MEP, a enfatisa cu e ta un persona cu ta kere den democracia y p’esey e ta presente hunto cu su Fraccion na e ocacion importante aki pa democracia di nos pais. Durante un entrevista, el a expresa su deseo cu Aña Parlamentario aki promove un democracia mas fuerte di loke a pasa e Aña Parlamentario cu a pasa.
Segun Parlamentario Wever-Croes, Gobernador su discurso ta basicamente un discurso di Gobierno y con Gobierno ta mira e aña nos dilanti, cu hopi bunita idea y bunita plannan. Lamentablemente, el a expresa, mucho poco atencion a ser poni na e crisis y e dolornan den comunidad.
“Ami ta di opinion cu e discurso di Gobierno mas bien a demostra cu nan no ta conecta cu e dolornan den comunidad”, Wever-Croes a expesa.
Entre otro, el a menciona cu costo di bida halto no a wordo adresa. Criminalidad, especialmente bou di nos hobennan, tampoco. E problemanan den enseñansa pa cu scarcedad di maestronan tampoco a wordo atende. E falta di vivienda y un plan concreto riba termino cortico, tampoco a wordo menciona. Y sin papia mes di nos turismo, cu ta den crisis, pero no a pone atencion pa un solucion urgente.
“Esakinan ta cosnan cu nos ta lamenta y nos lo sigui enfoca riba esakinan den e tempo nos dilanti. Mi ta spera. Manera mi a bisa, mi ta un persona cu ta kere den democracia y importancia di democracia. Democracia no ta un regalo. Democracia no ta un wega. Democracia ta un deber constitucional cu cada parlamentario tin pa protehe y pa crea confiansa den comunidad. Esaki lo ta mi compromiso e aña nos dilanti aki tambe”, el a enfatisa.
