Evelyn Wever-Croes: Tratamento di presupuesto 2026 ta motibo di hubilo
ORANJESTAD (AAN): “Awe nos tur tin motibo di ta positivo. Mi a trata presupuestonan pa 15 aña aki den, y awe danki na e bon maneho financiero hiba door di nos gobierno, tin fondo pa e gobierno di turno por ehecuta su vision. Esaki ta loke ma papia cu sr. Eman dia di traspaso di gobernacion 9 luna pasa. El a gradici mi pa a recupera nos pais financieramente, y pa awor e tin placa pa duna bek. Y mi a bise, cu tanten e ta duna bek na comunidad, specialmente na esnan cu mas mester di dj’e, e lo no tin problema. Pasobra ta p’esey nos a genera e fondonan. Pa duna bek na comunidad” tabata palabranan di señora Evelyn Wever-Croes.
El’a gradici un biaha mas ex Minister Xiomara Maduro y su team, pa su vision y determinacion pa pone Aruba bek riba trayecto financiero responsabel.
Tambe el’a gradici na e Minister di Finanzas actual, Geoffrey Wever, pa a sigui cu e maneho. El’a gradici tambe profesionalnan di departamento di Finanzas, departamento di Impuesto, departamento di Legislacion, departamento di Economia, y tur profesional di gobierno.
“Lamentablemente e positivismo aki ta bou presion si, pasobra drentando 40 aña di existencia di e Parlamento aki, e vision nobo di e Parlamento aki, ta manda nos Parlamento mas cu 10 aña atras. Di con? pasobra pa e presupuesto importante aki, nos a haya apenas 3 minuut pa haci pregunta pa cada ministerio, y despues di protesta, el a bira 3.5 minuut pa cada ministerio”, señora Wever-Croes a expresa.
Durante Gabinete Wever-Croes a bin cu un regla nobo di transparencia, a reparti e tratamento di presupuesto, dos minister cada biaha, y 20 minuut pa parlamentarionan por haci pregunta. Reunionnan tabata bay mas al caso, mas eficiente, y pueblo por a siguiu e reunionnan hopi miho.
“Esaki ta un desaroyo hopi peligroso pa nos democracia, y e ta loke nos a mira ta pasando: gobierno no ta contesta 80% di preguntanan, gobierno no ta bin reunionnan cu parlamentarionan pidi, vice presidente di parlamento contra Constitucion a stroba nos fraccion di haci nos trabao, y p’esey e decision di limita nos tempo na 3 minuut aki, mi ta considera un mancha mahos drentando e conmemoracion di 40 aña di Parlamento”, Evelyn Wever-Croes a expresa.
