Eduard Pieters di Fraccion PPA:
ORANJESTAD (AAN): Durante su conferencia di prensa di diamars, parlamentario Eduard Pieters di fraccion di PPA a bolbe haci un apelacion urgente na Gobierno relaciona cu e topico di nos grandinan. Pieters como representante di PPA ta aplaudi e accion di reparatietoeslag pa nos pensionadonan y esaki sigur ta un paso den direccion corecto y PPA ta contento cu esaki.
Desde campaña, PPA a para firme pa lucha pa un bida mas husto y digno pa nos grandinan, pa nan por yega, via pensioen of otro toeslag, lo mas cerca posibel di e bestaansminimum di Aruba. Pero Pieters a enfatisa cu alivio financiero so no ta suficiente, si nos no wak e panorama mas grandi: e costo y sostenibilidad di cuido di adulto mayor den futuro cercano.
E cifranan ta exigi accion awor!
E realidad financiero ta contundente. Den periodo 2024–2025, e costo total di cuido di adulto mayor tabata Awg. 102,9 miyon. Considerando cu riba 20% di nos poblacion ta adulto mayor, esaki no ta un dato marginal, sino un señal di alarma.
Segun Pieters, e cuido aki ta dividi den dos forma principal. Cuido extramural, of cuido na cas, a costa pais Aruba Awg. 44,3 miyon pa 2.160 persona. Traduci esaki pa persona, ta aproximadamente Awg. 20.000 pa adulto mayor pa aña. Cuido intramural, manera Paviljoen, Maris Stella y e casnan priva, ta representa Awg. 58,6 miyon pa apenas 655 persona, cu ta Awg. 88.000 pa persona pa aña.
“Bo no mester ta experto pa mira e diferencia. Cu e mesun recurso, cuido na cas por yega na mucho mas hende, cu un costo considerablemente mas abou,” el a señala.
Cuido na Cas: Mas humano y mas sostenibel
Pieters a subraya cu e cifranan ta mustra un caminda cla: Aruba mester inverti mas den cuido extramural. Cuido na cas no solamente ta mas eficiente financieramente, pero tambe ta mas humano. Ta permiti cu adulto mayor ta keda den nan ambiente familiar, cu mas independencia y dignidad.
“Claro cu esaki no por haci sin preparacion y atencion debido. Cuido na cas ta rekeri sosten, profesionalismo, guia y coordinacion entre gobierno, sector priva y famia. Esaki mester ta un esfuerzo colectivo. Pero si nos no cuminsa awor, e costo den futuro lo ta insostenibel”.
Mirando pa 2040: Un deber di awor
E urgencia ta mas grandi ainda ora nos wak e proyeccionnan. “Pa 2040, adulto mayor (65+) lo representa aproximadamente 24% di nos poblacion. Si nos sigui cu e mesun modelo actual, e gastonan di cuido lo por triplifica y yega te Awg. 300 miyon. Esaki no ta un sorpresa; e cifranan di CBS y SVB ta mustra claramente con nos poblacion ta enbeheciendo.
P’esey, segun PPA, e momento pa traha riba un plan di accion ta awe, no despues. Un plan basa riba data, cu cambio strategico pa mastanto cuido na cas y preparacion pa futuro” Eduard a expresa.
Pa conclui Parlamentario Eduard Pieters a enfatisa cu nos adultonan mayor ta nos columna vertebral. “Nan a construi Aruba manera nos ta conoce awe y nos tin un compromiso moral y emocional cu nan. PPA ta keda insisti cu e asunto aki mester ta trata cu mas seriedad y vision. Inverti den cuido na cas no ta un opcion, sino ta un necesidad pa garantisa dignidad, sostenibilidad y respet pa nos grandinan, awe y den futuro”.
