Partido MEP cu pregunta clave na Marisol Lopez-Tromp:
ORANJESTAD (AAN): Despues cu MEP a lansa e pregunta siman pasa cu si e parlamentario Marisol Lopez-Tromp ta sospechoso si of no di un of otro caso di otorgamento di tereno di pueblo, e parlamentario a dicidi di keda keto keto y a prefera di bay den un atake contra nos Minister di Turismo Dangui Oduber pa loke ta nombramento di un miembro den e Hunta di Supervision di Aruba Tourism Authority (ATA), alegando cu e persona aki lo ta famia di e minister concerni.
Sinembargo e parlamentario aki mes a presenta copia di e Landsbesluit di 24 augustus 2022 firma pa Gobernador cu ta mustra claramente cu esaki ta un nombramento legitimo y cu a cumpli cu tur norma y regla di bon gobernacion. Hecho ta cu e miembro nobo di Hunta di Supervision – familiar of no !- ta un persona sumamente capacita y integro cu pa añanan largo a traha pa turismo di Aruba y ta gosa di confianza total di e minister concerni pa forma parti di e Hunta di Supervision trahando na bienestar di ATA y henter Aruba.
Presidente Comisario di FCCA: E confianza menciona ta igual cu tempo Marisol Lopez-Tromp tabata minister caminda el a nombra un amigo fiel di dje - for di tempo cu nan tabata studiante y musico na Hulanda - como Presidente Comisario di FCCA y cual fundacion tabata worde dirigi te for di Hulanda (!) caminda e presidente aki tabata biba y traha.
Pues na Aruba tabatin un spirito cu tabata guia e fundacion FCCA y esaki cu bendicion di Marisol Lopez-Tromp, ya cu e confianza total den e amigo fiel a prevalece! Con nos mester yama e forma di traha inusual aki y cu a haya bendicion di Marisol Lopez Tromp? Nepotismo?
Contractnan lucrativo: Den su rabia y odio contra MEP, Marisol ta acusa MEP pa practica di nepotismo, pero e nepotismo den optima forma y total a ser practica pa Marisol Lopez-Tromp mes.
Lo ta bon pa Marisol splica pueblo di con su casa y su companianan aparentemente tabata haya un gran cantidad di contract di gobierno y empresanan estatal desde cu el a drenta politica y a asumi encargo ministerial, tanto bao geel, berde y blauw? Contractnan di Watty Vos Blvd, Green Corridor, Aruba Tourism Authority, Arubus, WEB Aruba NV, NV Elmar, AZV, Lotto pa Deporte, Serlimar etc. Acaso ta su casa ta e unico profesional na Aruba cu mag disfruta di tur e contractnan lucrativo aki?
Brug di Madushi: Si Marisol Lopez-Tromp awe ta papia di nepotismo den MEP, su persona mes a practica esaki den optima forma tempo cu e tabata minister pa nos partido y caminda partido MEP a worde lastra malamente den campaña pa eleccion pa loke Marisol a haci e tempo ey, esta percura pa construccion di e Brug di Madushi, caminda a traha un brug costoso di 600 mil Florin pa e cas den ruina di Madushi na Noord.
Acaso nos no por papia tambe di nepotismo ora cu ruman ta percura pa otro ruman kende ta tesorero di MAS den tempo record haya tereno di pueblo pa por construi un compleho di apartamento na Noord?
Acuerdo spirito: Otro forma di nepotismo cu a worde practica den su propio partido MAS tabata caminda Marisol a laga tur candidato firma un acuerdo, esta esun cu haya mas voto lo drenta parlamento. Y kico nos tur por a mira? E mesun Marisol aki a perde tur credibilidad como lider ya cu el a laga e candidato mas yega na dje, esta amiga Gunn cu 77 voto bira parlamentario y e candidato Lacle cu a haya 189 voto a keda benta un banda. Aki friendship ta bay riba acuerdo spirito!
Finalmente, partido MEP a trece tur e ehempelnan aki padilanti di nepotismo practica pa Marisol Lopez-Tromp pa demostra cu ora bo ta scupi den laira, wak pa esaki no cay den bo propio cara.
