Eduard Pieters di PPA:
ORANJESTAD (AAN): Fundacion Famia Planea Aruba (FPA) ta celebra un logro historico y di inmenso balor: 55 aña di existencia, 55 aña di compromiso incansabel cu bienestar, formacion y desaroyo di nos comunidad.
Encuanto esaki, Parlamentario Eduard Pietersa declara: ‘Pa nos, como fraccion di PPA, esaki no ta simplemente un aniversario, ya cu esaki ta un celebracion di un institucion cu pa derechi ta considera como un columna vertebral den e area critico di educacion sexual, salud sexual preventivo y formacion di famia riba nos isla. Nos ta expresa un pabien di curason y un profundo aprecio pa tur esnan cu a dedica nan bida profesional na e mision noble di Fundacion Famia Planea Aruba”.
Cu material nobo: Durante e celebracion fundacion FPA a presenta un paso di gran importancia pa futuro di nos mucha: un material educativo nobo, desaroya den colaboracion cu un instituto di Hulanda. Esaki ta mustra un liderazgo visionario y un enfoke fundamental den evidencia y educacion moderno.
E material aki, cu ya ta traduci y pronto lo yega scol, ta siña nos muchanan pa: (*) Balora nan mesun curpa. (*) Comprende sexualidad na manera apropia pa nan edad. (*) Respeta limite y norma social. (*) Y specialmente con ta tuma decision sabi pa preveni malesa transmisibel.
E acercamento didactico-pedagogico ta basa riba desaroyo di e habilidadnan pa cuido propio, autoestima, pensamento critico y respet. Esaki ta forma e base pa lanta un generacion mas saludabel sexualmente, cu mas seguridad, control y claridad riba nan derechonan y responsabilidad personal.
Balor di aliansa internacional: Segun Eduard: “Como un isla chikito cu recurso limita, Aruba mester traha strategicamente den colaboracion cu e instancianan den exterior. Esaki ta un strategia sabi, pragmatico y apropia na nos realidad. E institutonan di exterior tin decada di experiencia, investigacion y marco real robusto: cu nan guia, Aruba por adapta, contextualisa y obtene material educativo cu ta realmente alinea cu standard internacional y cu necesidad local. Asina nos ta yega na un producto final cu ta mas fuerte, al caso, actualisa y cu hopi mas impacto den enseñansa”.
E tipo di colaboracion aki ta mustra liderazgo y ambicion. Ta pone Aruba riba mapa como un pais cu ta opta pa calidad y prevencion.
Finalmente Eduard Pieters a expresa: “Pa e 55 aña di entrega, compromiso y liderazgo, fraccion di PPA ta desea Fundacion Famia Planea Aruba hopi mas aña di exito, innovacion y impacto positivo. Nos ta gradici tur profesional cu a traha y ta sigui traha pa bienestar di nos famianan y nos mucha- y hobennan”.
E lanzamento di awe ta prueba cu, ora nos uni forsa, Aruba por avansa cu dignidad, claridad y un vision solido pa futuro sano y protega.
Di parti di fraccion di PPA nan ta desea fundacion FPA hopi aña mas di existencia.
