Crisis di vivienda ta directamente vincula cu futuro di nos profesionalnan hoben

Crisis di vivienda ta directamente vincula cu futuro di nos profesionalnan hoben

Parlamentario Eduard Pieters:

ORANJESTAD (AAN): Ki bal un diploma universitario y e deseo di contribui na desaroyo di bo pais, si despues di tur e sacrificionan bo no por haya entre otro un hogar pa construi bo futuro? Esey ta e preocupacion cu parlamentario y lider di fraccion di Partido Patriotico di Aruba (PPA), Eduard Pieters, a expresa durante un encuentro cu prensa, relacionando e crisis di vivienda directamente cu futuro di nos profesionalnan hoben.

Segun Pieters, Aruba no por sigui inverti den educacion di su hobennan, stimula nan pa studia den exterior of localmente, sin crea e condicionnan necesario pa nan keda of regresa pa contribui na desaroyo di nan pais.

Brain gain en bes di brain drain

Pieters a enfatisa cu Aruba mester aspira pa brain gain: atrae y retene e profesionalnan prepara cu por contribui na crecemento economico y social di nos isla. Sinembargo, e ta cuestiona con Aruba por logra esaki si e mesun profesionalnan no por haya vivienda accesibel. Segun Pieters: “No ta suficiente pa ofrece preparacion academico y oportunidadnan di empleo. Un pais cu kier desaroya mester crea tambe e condicionnan pa su hobennan por independisa nan mes, forma un famia y establece nan futuro”.

E crisis di vivienda ta afecta futuro di nos famianan

Pieters a señala cu e dificultad pa haya un tereno of construi un cas ta afecta directamente e parehanan hoben, e profesionalnan cu ta drenta mercado laboral y e personanan cu kier forma un famia. El a adverti, cu si hobennan no por independisa nan mes y establece un hogar, esaki por tin consecuencia pa e desaroyo demografico y economico di Aruba.“Un pais cu no logra retene su talento ni facilita stabilidad pa su generacionnan hoben ta pone su propio futuro bou di presion”, el a expresa.

“Tax Holiday” riba construccion como instrumento pa crea oportunidad

Pieters a expresa su sosten na e proposicion presenta pa lider di PPA, Otmar Oduber, pa introduci un Tax Holiday riba construccion di vivienda. E iniciativa ta contempla exoneracion di ‘overdrachtsbelasting’, ‘invoerrechten’ y BBO p’e casnan di te 120 meter cuadra, cu un costo di construccion di referencia di te Afl. 2.800 pa meter cuadra. Segun PPA, e alivio fiscal por contribui na un reduccion di mss o menos 10% den gasto di construccion, dependiendo di e condicionnan cu finalmente wordo establece.

Oduber a argumenta cu si Aruba anteriormente por a introduci incentivo fiscal pa stimula inversion den sector hotelero, Gobierno mester por considera un instrumento similar pa facilita construccion di cas pa su propio ciudadanonan. Pa Pieters, e iniciativa aki ta mas cu un medida fiscal: ta un inversion den futuro di profesionalnan hoben. “Un dak riba bo cabes ta un necesidad basico”

Pieters a recorda cu, aunke oportunidadnan di empleo ta importante, un hogar ta un necesidad fundamental di cada ser humano. Maneho di vivienda mester forma parti di un vision nacional di desaroyo cu ta preveni perdida di talento y fortalece futuro forsa laboral di Aruba.

Pieters a indica cu e proposicion di PPA merece consideracion serio den e debate politico y presupuestario, cu e meta di transforma e idea den medida concreto. E mensahe di Pieters ta cla: “Aruba no por pidi su hobennan pa regresa, traha y construi e pais, mientras e posibilidad pa nan construi un hogar propio ta bira cada bes mas leu”.

Pa PPA, e discusion di vivienda no ta solamente tocante cement, bloki y tereno, sino futuro di nos profesionalnan, stabilidad di nos famianan y desaroyo di Aruba.