Parlamentario Endy Croes riba caso Avestruz:
ORANJESTAD (AAN): Parlamentario Endy Croes di MEP, awor cu ta acercando e veredicto final di Caso Avestruz na April venidero, e ta recorda pueblo cu corupcion miyonario di AVP no ta djis un storia di pasado, sino un daño cu ciudadanonan ta sinti te awe. “E corupcion aki a horta e futuro di bo yiu y di bo nieto,” Croes a declara, mustrando e documentonan oficial di caso Avestruz.
‘Amigonan prome, Pueblo ultimo’: Segun Croes, caso Avestruz a proba con un "gang" (grupo) cera di amigonan a enrikece nan mes cu loke ta di nos tur.
E deal: Benny Sevinger tabata duna terenonan comercial grandi na un grupo selecto di amigonan contra tur regla.
E benta: E amigonan aki tabata bira bende e NV mesora pa miyones di Florin cu stranhero.
E fabor: A cambio, Minister tabata ricibi "regalo" manera e fiesta di 15 aña di su yiu den ballroom di hotel.
Parlamentario Croes a splica cu hopi hende ta pensa cu esaki ta un caso di corupcion di Gobierno y cu ta na Gobierno pa ‘deal’ cu e asunto. Pero e realidad ta doloroso, e caso aki ta afecta abo directamente:
Falta di tereno pa cas: Mientras Benny tabata regala hectareanan di tereno na su amigonan pa nan bende y bira miyonario, awe abo mester warda 10 pa 15 aña riba un lista di espera pa un pida tereno pa traha un cas pa bo famia. Nan a bende bo derecho di tin un hogar pa nan mesun beneficio.
Ora amigonan di AVP bende tereno di pueblo pa miyones di dollar na inversionistanan stranhero, e prijs di tur cos rond di dje ta subi. Esaki ta un di e motibonan pakico bida a bira asina caro pa nos tur.
Mega Debe: E placa cu mester a drenta den caha di gobierno pa drecha bo caya gelapi, e scol di bo yiu, of bo centro di bario, tur e placa aki a bay den saco di e "gang" di Avestruz.
"Premium Brands" riba bo custia: Den e dossier legal (pagina 38), Pristine Estates (Holiday Inn) a admiti di a paga USD 7.968,89 pa e fiesta di 15 aña di e yiu di Benny Sevinger.
“Imagina bo,” Croes a bisa, “mientras abo ta lucha pa paga bo recibo di awa y coriente, e elite di AVP tabata goza di alcohol di 'Premium Brands' paga pa doñonan di hotel cu tabata busca fabor di Minister."
Un aviso pa luna di Maart: Endy Croes a manda un aviso cla: "Tene boso toontjie lager." Durante luna di Maart, e lo sigui desmantela e caso aki pida pa pida.
"Pueblo mester sa cu e falta di tereno pa bo yiu awe, tin un nomber, un fam y un partido politico: Benny Sevinger y AVP. Den April, husticia lo papia: Husticia por tarda, pero e ta yega si!"
E potret aki ta pa cortesia di Endy Croes.
