ORANJESTAD (AAN) — “Awor kende ta responsabel pa e resultadonan pa Aruba?” Esaki ta e ultimo parti di e conclusion cu nos mester presenta awe, despues di a sigui cu nos prome analisis di e rapport
di 168 pagina riba Refineria di Aruba, un compania cu a mira luz dia 30 di September 2016.
E motibo cu Aruba como pais a lanta un compania tabata, cu Mike Eman durante un biahe pa Cuba a haya oportunidad pa combersa cu Nicolas Maduro y cu Mike Eman a lidera e esfuersonan pa Aruba a bira partner di Nicolas Maduro pa motibo di Citgo.
Mike Eman a dirigi e proceso pa yega na un acuerdo cu Nicolas Maduro, cu tabata e homber cu a uza Citgo como su baca di lechi y ora placa di Citgo y di Venezuela a caba, a hipoteca Citgo cu no por wordo considera propiedad di Venezuela.
Mike Eman tabata e homber cu a pone Aruba baila pa e proyecto di Citgo, cu a nace cu marca di fracaso cu Aruba no por a mira pasobra contra nos base legal, Mike Eman a trata Citgo como su asunto y hasta a kibra ley pa hasta e acuerdo a keda secreto pa Aruba.
Na momento triunfal, Mike Eman a presenta su mes como e gran homber tras di proyecto Citgo y a ignora rapportnan di expertonan di Aruba, cu hasta a mustra cu e acuerdo Citgo a wordo negocia y firma contra reglanan di Ley di Aruba.
Awe un rapport di expertonan ta mira luz. Un rapport cu DIARIO ta presenta na su lectornan y cu Ministerio Publico di Aruba mester atende.
Uno mas di e casonan cu a nace durante Gobierno Mike Eman, cu te ainda no kier admiti e forma cu el a abusa di 1.6 Miljard (cu probablemente lo bira mucho mas) pero tambe ainda cerca nos tin mucho mas pregunta.
Nomber di varios hende cu tabata ministro of por a hunga un papel den e asunto, ta wordo menciona riba caya.
Den DIARIO e prome nomber cu nos ta lansa na prome luga ta Mike Eman, cu den cada nota cu e publica ta bolbe splica cu e tabata Prome Ministro.
Awor e momento a yega pa Mike bandona e cashi den cual el a bay sconde ora el a baha como Prome Ministro y a nenga di drenta Parlamento.
Como Prome Ministro, Mike Eman tabata Presidente di e Conseho di Ministro, cu tabata tin su signatura.
Den e rapport di Bo Aruba di 1.6 Miljard, Algemene Rekenkamer Aruba a menciona Mike como Prome Ministro cu tabata dicidi directamente riba e proyectonan di 1.6 Miljard hunto cu Benny Sevinger cu tabata Ministro di Infrastructura.
E rapport cu expertonan a traha riba Refineria di Aruba, cu tabata invento y creacion di e Gobierno di Mike Eman den cuadro di su acuerdo cu Nicolas Maduro, ta exigi pa Mike Eman asumi su responsabilidad pa e Gobierno cu el a dirigi y pa e proyecto cu el a trece na man di Nicolas Maduro.
Hunto cu Pueblo DIARIO lo atende e rapport di expertonan cu ta contene otro nucleo di berguensa gubernamental cu a nace den cuna di e gobierno cu ta hiba e nomber di Gobierno Mike Eman, e prome responsabel pa Refineria di Aruba pa sirbi interes di Nicolas Maduro.
