ORANJESTAD (AAN) – Minister Ursell Arends, den entrevista cu DIARIO tocante e cooperacion cu a surgi entre e Islanan di Caribe Hulandes, pa traha hunto den e desaroyo di e sector primario, a señala den na e Islanan BES (Bonaire, St. Eustatius y Saba) por wak cu door di e asistencia cu nan ta hayando for di Hulanda, tin areanan unda nan
ta un tiki mas avanza, pero Aruba por siña for di nan.
E dignatario a splica cu por ehemplo na Bonaire tin un aplicacion cu ta registra tur e cabritonan, loke na Aruba ta wordo haci door di excel. “Si nos tambe por haya un aplicacion asina, anto ta duna un adelanto na introduci tecnologia den sector primario y cu nos ta sigui avanza den e sector aki”, e minister a señala.
Riba esaki e Islanan a discuti ampliamente durante e Conferencia y tambe riba acceso pa financiamento pa logra cierto di e proyectonan. “Mi por bisa cu mi ta hopi entusiasma y tambe e Comisionnan y diputadonan cu tabata tey presente, a mustra compromiso pa nan pais pa traha hunto den Reino, pa logra cosnan grandi pa nos paisnan”, Minister Ursell Arends a subraya.
E mandatario a indica cu na Aruba tin hopi peticion y interes pa tereno pa sembra. E ta corda cu durante e pandemia, esaki a wordo stimula grandemente bao di nos poblacion, y aworaki ademas di agricultura, e criadornan di bestia tambe tin un apetit grandi pa tereno pa desaroya e area aki. Arends a expresa cu esaki ta algo na nivel inter-ministerial, y e como Minister di Naturaleza bao cual sector primario ta resorta, pero ta yega bek na minister di Economia, Salud Publico y Minister Presidente, cu ta responsable pa infrastructura.
“Di e forma aki nos ta trahando conhuntamente cu otro, pa garantiza cu e terenonan segun ROP y ROPV, por wordo ubica debidamente, na criadornan di bestia y agricultornan, pa asina aki por sigui stimula e industria aki” Arends a acentua.
Segun Minister Arends, den e plan di gobernacion ta para claramente, cu pa 2025 kier logra 15% di seguridad di alimentacion cultiva y prepara localmente y e ta kere cu den e proximo lunanan nos dilanti, lo mester cuminza haci e terenonan accesible, pa por logra e meta.
