Eduard Pieters, lider di PPA:
ORANJESTAD (AAN) Den entrevista cu Matutino DIARIO, tocante e reunion di Parlamento cu CMO (Crisis Management Office), Eduard Pieters, lider di fraccion di PPA, a bisa cu den tur nan conferencianan di prensa y publicacionnan, PPA ta reitera cu Aruba tin su hendenan local cu tin e conocementonan aki, pasobra nan a profesionaliza nan mes riba e area di crisis.
“Nos tin nos plannan pa salvaguardia, pa scapa e pais aki, pero no solamente esey sino pa bons nos mes bek. Asina nos a demostra den temporada di Covid-19, pues aworaki no ta nada otro. Nos tin nos plannan y CMO a trece esaki dilanti tambe”, Pieters a reitera.
Tocante e crisis funds, e parlamentario y lider di fraccion di PPA, a bisa cu e tema aki mester bay trat’e cu Minister di Finanzas, pasobra e pregunta aki el a haci’e durante e reunion publico, pero nan no ta haya e contesta palpable y concreto.
“Aworaki ta trahando riba un fondo di inversion, cu tambe ta importante, pero nos mester traha tambe riba e ‘Calamiteiten Verordening’ cu mester wordo moderniza, mescos cu e leynan di enseñanza. E Calamiteiten Verordening, for di siglo pasa mester wordo moderniza y esaki ta un yamada na Parlamento di Aruba, cu nos mester pone accion na nos palabranan y cuminza traha riba e Crisisverordening, pa caba; pa moderniza e leynan pa si un calamidad mester toca Aruba, Dios kier cu no, nos por acapara e crisis na un manera efectivo y eficiente”, Parlamentario Eduard Pieters a conclui.
