Eduard Pieters di PPA:
- Awor hende ta bende slot ilegalmente
ORANJESTAD (AAN): Lider di fraccion di PPA, Eduard Pieters, a bolbe pone un problema cu el a denuncia desde maart riba mesa: e personanan cu a haya nan permiso pa establece y traha na Aruba, ainda ta enfrentando dificultad pa haya cita na Censo pa completa nan inscripcion. PPA ta responsabilisa Minister Dowers pa e caos den inscripcion y ta alerta cu falta di capacidad ta afectando directamente dignidad y siguridad social di hende.
Segun Pieters, cinco luna despues di su prome denuncia, e problema no solamente ta persisti, sino cu awo tin e señalnan cu un mercado ilegal di cita ta surgi, caminda supuestamente e slotnan ta ofreci pa e sumanan entre 50 Florin y 200 Florin.
“Na maart nos a alerta Gobierno. Awe nos ta augustus y e sistema ainda ta bisa hende cu no tin cupo. Cinco luna despues nos ta papia di e mesun problema.”
Ministro su culpa: “No culpa director di Censo; responsabilidad ta di minister”. Pieters a laga cla, cu e problema no mester ta poni riba direccion y trahadonan di Censo. El a referi na e declaracionnan di direccion cu ta indica cu sin suficiente personal, fondo y e recursonan, e departamento no por procesa e cantidad adicional di e personanan cu mester registra.
Pa Pieters, esey ta precisamente unda responsabilidad politico ta cuminsa. Si Gobierno tuma un decision pa otorga e permitnan riba escala mas grandi, Gobierno mester anticipa e consecuencia administrativo y ekipa Censo pa absorba e demanda adicional. “Bo no por tuma un decision na un banda y laga bo departamento sin hende y sin recurso na otro banda. Si bo crea e fluho, bo mester prepara e sistema.”
Segun Pieters, PPA ya na maart a pidi e ministernan concerni, pa interveni y remedia e situacion. Sinembargo, na augustus e problema ainda ta presente.
Bendemento di cita: Awor ta bati alarma pa supuesto benta ilegal di cita. E situacion a bira mas preocupante, segun Pieters, despues cu PPA a ricibi e señalnan via diferente plafaforma social, cu cita pa Censo ta ofreci ilegalmente pa placa. El a menciona sumanan entre 50 y 200 Florin. Pieters a reconoce cu, segun e informacion cu e tin, ainda no tin un denuncia formal presenta, pero ta considera e señalnan suficientemente serio pa Gobierno investiga inmediatamente. “Unda tin huma, tin candela. Minister mester wak urgentemente kico ta pasando.”
Pa e lider di fraccion, si falta di capacidad den un servicio publico ta crea un mercado, caminda ciudadano desespera ta sinti cu mester paga pa un cita, Gobierno no por trata esey como un problema administrativo chikito.
Consecuencia: Pieters a enfatisa cu tras di cada cita tin un persona. Un hende por haya permiso pa traha y establece na Aruba, pero sin completa su inscripcion, por enfrenta dificultad pa regla otro asunto esencial relaciona cu seguro social, financiamento y acceso na servicio.
El a menciona particularmente e situacionnan di e personanan cu ta na estado y cu, pa motibo di problema den registracion, por termina preocupa tocante cobertura medico y gasto di parto.
“Nos ta papia di ser humano. Un decision administrativo descabeya no por termina afectando dignidad di hende.” Pa Pieters, esey ta haci e situacion mas urgente cu simplemente un website cu no tin cita disponibel.
Ombudsman tambe a hala atencion: Segun Pieters, PPA no ta e unico cu a hala atencion riba e problema aki. El a indica cu Ombudsman tambe a expresa su preocupacion tocante e situacion, mientras PPA a bin ta denunciando e asunto aki desde maart y awor ta bolbe mishi cu e tema aki. Awe fraccion a bolbe manda pregunta pa Gobierno, pa haya claridad tocante kico ta haci pa elimina e atraso y aumenta capacidad. Pieters tambe a menciona e posibilidad di un sistema conecta cu DIMAS pa haci e proceso mas eficiente, cu e mesun direccion a laga sa cu nan tin mester.
Finalmente Pieters su mensahe na Gobierno y Minister Dowers ta directo: duna Censo e personal, sistema y fondo necesario pa atende ciudadano dignamente. “Si Censo mester recurso financiero, bin Parlamento. Nos ta dispuesto pa haci e trabao necesario. Pero cinco luna despues, Gobierno no por sigui laga hende desespera pa un simpel cita.”
Pa PPA, e cuestion fundamental ta responsabilidad politico: si Gobierno aumenta e cantidad di permiso, Gobierno tambe tin obligacion di prepara e aparato publico pa e consecuencia di su propio decision.
