Parlamentario Fraccion di AVP, Jennifer Arends-Reyes:
ORANJESTAD (AAN): Despues di un exitoso Ipko 2026, Jennifer Arends-Reyes, Presidente di Comision di Asuntonan di Reino y Relacionnan Exterior di Parlamento di Aruba, a enfatisa cu awo ta keda na cada pais pa atende cu ehecusion di e informacion cu a ricibi durante e reunionnan di Ipko.
El a indica cu durante Ipko 2026, Parlamentonan di paisnan den Reino a duna informacionnan y a intercambia pensamento y opinionnan. Pero e trabao mes, ta keda na Parlamentonan di cada pais den Reino pa atende cu su ehecucion segun prioridad y vison di cada pais, teniendo cuenta cu cada pais ta diferente.
E Parlamentario a indica cu cada tema cu a keda presenta den e reunionnan di Ipko, tin representacion den ministerionan y comisionnan den Parlamento indicando cu hopi rapport riba e temanan aki ta existi caba. “Awor aki, nos mester bay riba ehecucion di e temanan aki. Cada ministerio mester percura pa e plan di ehecucion. Y Parlamento mester controla con esaki ta bayendo.
Parlamentario Arends-Reyes a duna di conoce cu proyectonan cu a wordo laga atras di otro gobierno, cu por wordo implementa di biaha, ta wordo anilisa y por wordo implementa di biaha. Y hopi biaha ta depende tanto riba e costo mara na esakinan y sigur tambe na e vision y e prioridad cu e gobierno nobo tin.
El a indica cu Parlamento ta sigui traha riba diferente tema cu ya tin, entre otro siguridad, trafico, finanzas. El a menciona cu tin diferente presupuesto na caminda pa Parlamento. Tambe ta wardando riba diferente conseho di Raad van State riba entre otro geschillenregeling y Hofa.
“Cada pais ta diferente. Sea ta ley, cambionan, amiendanan, cada pais apart mester traha riba loke a wordo presenta den Ipko cu ta na prioridad y segun vision di nos mesun paisnan den Reino”, Parlamentario Arends-Reyes a duna di conoce.
