MEP na Melvin Tromp di AVP:
ORANJESTAD (AAN): Na tur e declaracionnan duna di parti di AVP, por constata un consternacion y panico total pasobra cu MEP a logra un proyecto asina grandi y importante pa Aruba cu ta e proyecto di Eagle LNG.
Flip flop Mike de Meza: Mike Flip Flop de Meza a contradeci su mes asina hopi biaha, cu ya niun hende ta kere mas pasobra na 2016 no tabatin ningun proyecto miho cu su proyecto di gas. Na 2016 no tabatin niun proyecto di gas mas safe y sigur cu su proyecto di gas. Na 2020 ainda ta lamenta cu na su parecer MEP a laga e proyecto di gas cay te ora cu pa su sorpresa WEB Aruba NV a anuncia su acuerdo cu Eagle LNG. Awo desde december 2021 no tin pio proyecto pa Aruba cu esun di gas.
No tin proyecto mas insigur y peligroso cu e proyecto di gas cu MEP a logra. Pues un disparate total di ‘Flip Flop Mike’.
Pa colmo e un ex parlamentario di AVP a dicidi di “sali for di mondi” pa grita algo sin cu obviamente e ta compronde e materia. El a declara den Awemainta di 14 di januari 2022: “Lati Wever no kier a informa Parlamentarionan den Parlamento pero na WEB Aruba NV si.” Un declaracion cu cual lamentablemente ta constata cu ex parlamentario Sr. Tromp no ta compronde kico ta e materia. Tampoco ta compronde kico ta un NDA. Pa nos splic’e: NDA ta un non-disclosure agreement. Un Non-disclosure agreement su definicion ta y nos ta cita: “A non-disclosure agreement is a legally binding contract that establishes a confidential relationship. The party or parties signing the agreement agree that sensitive information they may obtain will not be made available to any others”.
Dia cu Gobierno tabata den Parlamento pa informa Parlamento di e acuerdo cu Eagle LNG, e reunion a worde transmiti publicamente. Si Gobierno a duna detayenan di e contrato, WEB a viola e NDA cu tur su consecuencianan. P’esey Minister Glenbert Croes a haci un suplica na WEB pa a invita tur 21 parlamentario, pa nan acepta e invitacion di WEB tambe, no pa rondleiding ni buitendag manera AVP a catalog’e, pero pa haya contesta riba tur nan preguntanan. Y manera premira e coalicion den oposicion di AVP, MAS y Accion21, no a presenta djis pa nan por continua cu nan politikeria.
Cu AVP ta prefera keda hiba e politica anticua populista partidista di ta contra tur cos cu ta bon pa Aruba djis pasobra ta MEP a bin cu ne, sigui den boso abismo. Pero no purba crea panico, discordia y duda cu boso flip-flopping unda cu no tin pakico.
