Parlamentario Endy Croes:
ORANJESTAD (AAN): Parlamentario Endy Croes a splica cu Minister Gerlien Croes a bay Hulanda e siman aki. Un bishita oficial di varios dia, biahando businessclass, cu tres consehero y dos miembro di prensa. E gasto ta wordo calcula entre Afl. 40.000 pa Afl. 50.000. E pueblo Arubiano ta paga e cuenta di un biahe cu no tin sentido pa ningun hende.
Minister Gerlien Croes no ta transparente
Loke ta haci e biahe aki mas doloroso no ta solamente e gasto, pero mas bien e momento y falta total di transparencia. Parlamento no a wordo informa niun momento tocante e motibo ni necesidad di e bishita. Mescos cu un empleado di cualkier negoshi biaha sin pidi ni bisa su hefe di trabou. Alabes no tin agenda oficial, no tin mandato y no tin motibo urgente. Mientras tanto, gobierno Hulandes ta den estado demisionario. Staatssecretaris Szabo, cu tabata e persona cu cual Aruba tabata negocia, a laga su puesto y no tey mas. Tur negociacion a wordo pone ‘ON HOLD’. Ningun acuerdo formal no por wordo logra. E pregunta ta: kico minister Gerlien a bay haci ey? Esaki nos ta yama un snoepreisje!
Gerlien coriendo pa su responsabilidad
Den e contexto aki, ta dificil pa compronde dicon minister Gerlien Croes mester a bai Hulanda cu un grupo grandi. Especialmente awor. Su coalicion mes ta na riesgo di cay. E nombramento di Mike de Meza como minister ta na un punto critico. Gerlien Croes a para contra nombracion di Mike de Meza for di inicio. Pero si esey no pasa, e gobierno Eman-Croes por cay. En bez di tuma liderazgo den e situacion, e minister ta sali di e pais malgastando placa di pueblo na un manera despropocional. Pa un bishita cu ningun claridad riba loke mester wordo logra.
Na Hulanda actualmente no tin mandatario pa reuni cune
Laga nos pone bon cla: tin momentonan cu bishita oficial den exterior ta importante. Representacion den exterior por tin gran balor. Pero e momento aki no ta un di nan. No tin ningun mandatario pa papia cu nan na Hulanda paso gobierno Hulandes a cay. No tin mandato. Y e situacion politico aki na cas mes ta pidi responsabilidad y presencia. Un minister mester sirbi interes general. Mester cuida fondo publico y den tempo di incertidumbre mester comunica cla y honestamente cu Parlamento y pueblo. Ningun di esaki no a pasa. Contrario na locual Gerlien y Futuro a campaña cune. Palabra TRANSPARENCIA no ta fit mas den nan vocabulario!
E pueblo Arubiano merece claridad, responsabilidad y bon gobernacion – mucho mas den momento di crisis. Decisionnan manera e biahe aki, sin transparencia y sin meta cla, ta kibra e confiansa di pueblo den su gobierno. Ta ora cu e gobierno aki corda na ken e tin pa duna cuenta!
