ORANJESTAD (AAN): Por corda ainda con na October 2020 partido AVP, RED y parlamentario independiente Daphne Lejuez a vota contra e ley di screening di ministers. Esey ta loke Parlamentario Edgard Vrolijk di Partido MEP a indica.
Y awo cu detencion di parlamentario di AVP y number 29 riba e lista di AVP pa eleccion venidero, pueblo ta compronde pakico e ley aki por a ser pasa paso si el a ser pasa hamas y nunca Mike Eman of Benny Sevinger lo por bira minister of ta un candidato pa minister.
Ley di screening ta reglamenta cu bo no por ta sospechoso den un caso penal
E ley di screening cu a ser rechasa den Parlamento unda e intencion tabata reglamenta locual a pasa cu ley anterior cu Gobernador no a ractifica, unda cu ex Minister Paul Croes tabata sera como sospecho principal y por a keda como minister den Gabinete Mike Eman 2 y esaki tabata un berguensa y un bofta pa pais di Aruba cu tabata para pa corupcion. Y pa es motibo a bin cu e ley di screening nobo unda e intencion ta c’un candidato cu ta sospechoso den un caso penal manera ta e caso di Mike Eman y Benny hamas nan no por ta ni candidato pa minister. Y e ley tambe ta reglamenta cu si como minister bo bira sospechoso den un caso penal bo no por keda mas como minister.
Pues desaprobando e ley aki door di fraccionan di AVP, RED y parlamentario independiente ta laga e posibilidad habri c’un sospechoso por ta un cadidato pa minister y sigur si e persona bira un minister mañan e por keda cobra trankilamente como minister sin cu e mester tuma su retiro.
Proximo Parlamento mester pasa e Ley di Screening di Ministers: E proximo Parlamento tin e obligacion cu pueblo pa combati corupcion manera cu mi persona si a bin ta haci y den esaki nan mester pasa e ley di screening aki p’asina por sera e capitulo di berguensa cu Aruba como pais ta pasando aden. Pasando e ley aki ta percura pa hamas y nunca un sospechoso den un caso di corupcion no por ta ni candidato corda ta un minister.
Awo pueblo ta wak e malicia cu tabatin den Parlamento ora cu deliberadamente a keda sin aproba e ley aki y unda a sigui sostene corupcion. Pueblo por a spera esaki di fraccion di AVP y parlamentario independiente Lejuez cu hunto cu AVP a defende sr Benny Sevinger na momento cu Parlamento como entidad a sanciona sr Benny Sevinger cu su persona no por representa Parlamento den exterior paso e ta un berguensa pa entidad Parlamento di Aruba.
AVP hunto cu e parlamentario independiente a protesta contra e decision di Parlamento y awe un biaha mas ta wak cu e decision tabata uno corecto. Pero di fraccion RED hamas por a spera esaki lo vota contra e ley di screening, pa motibo cu RED cu tabata un partido cu semper a boga pa combati corupcion y netamente votando contra e ley a laga e opcion habri p’ un persona manera Benny Sevinger ainda por ta un candidato pa minister.
