Parlamentario Endy Croes:
ORANJESTAD (AAN): Parlamentario Endy Croes a tuma nota di un sentencia di hues data 3 di April 2025 esta siman pasa. Esaki ta trata di un otro caso cu Ministerio Publico a cuminsa contra Benny Sevinger ex minister di AVP cual caso a deriva for di e caso Avestrus.
Historia di casonan di Benny Sevinger di AVP
Dia 14 di April 2023 Benny Sevinger a ricibi su promer sentencia den caso Avestrus den eerste aanleg unda hues a condene cu castigo di prison pa passieve omkoping (soborno) y verduistering (malversion). Benny a dicidi di bay Hoger Beroep unda tres (3) hues lo a trata su caso di nobo. Dia 12 di Juli 2024 un total di tres (3) hues den Hoger Beroep a bolbe condena Benny Sevinger cu castigo di prison pero e biaha aki mucho mas pisa esta pa estafa, soborno, malversion y mal uzo di poder. Contra e decision aki awor Benny Sevinger a bay Cassatie unda den luna di mei proximo cinco (5) hues na Hulanda lo duna nan veredicto. Contra decision di Cassatie no tin mas caminda pa cana y mester bay cumpli cu e sentencia ey asina cu e bira conoci. Sentencia aki ta programa pa bira conoci final di mei 2025.
Ministerio Publico a cuminsa un otro caso pa obliga Benny paga bek
Despues di e promer sentencia contra Benny di AVP (14 April 2023), dia 30 di April 2023 Ministerio Publico a entama un otro caso contra Benny pa asina obliga Benny paga y debolbe Pais Aruba un suma di Afl. 914.651,72 florin como placa cu el a ricibi na un forma ilegal y a enrikece su mes cune (Ontnemingszaak). Den e sentencia di 3 di April 2025 riba e caso aki cual ta separa di e otro casonan cual awor ta den Cassatie, hues den promer instancia a dicta un sentencia obligando Benny Sevinger pa paga Pais Aruba bek Afl.840.051,91 cual ta e suma cu corte por a prueba cu Benny a ricibi na un forma ilegal.
Benny a inverti 445 mil cash den su cas y a paga 40 mil pa e yiu
Den e sentecia di 3 di April 2025 por a lesa sumanan extravagante cu Benny Sevinger a paga cash cual e no por a splica di unda e placanan aki a bin. Asina e ontnemingsrapportage a ilustra cu Benny a paga un suma total na placa cash di Afl.445 mil florin pa renoba y haci su cas extra luhoso. Tambe por a tuma nota cu Benny Sevinger a paga Afl.40 mil florin cash pa huur di un apartament luhoso na Brickell Miami pa e yiu cu awe ta Parlamentario.
Asina por a mira tambe den e rapport un otro suma di Afl. 74 mil cash paga na ticketnan pa e famia biaha. Ningun tabata tin splicacion husto di unda un ex minister di AVP por tabata tin acceso na tanto placa cash asina. Hues a dicta cu Benny mester debolbe pais Aruba Afl.840.051,91 di placa ilegal cu el a ricibi. Si e no cumpli cu esaki e lo haya 900 dia di prison adicional (acerca) pa e caso aki.
Pues pa ilustra cu e strafzaak den Cassatie actualmente ta completamente los di esun aki. Contra e caso aki Benny awor lo bay den Hoger Beroep. Tristo pa un hende por vota awendia ainda pa AVP como cu Mike Eman, Dowers, De Meza tur ta brasando Benny te cu dia di awe y asina AVP ta demostra keto bay di ta brasando corpucion.
