Parlamentario John Hart:
ORANJESTAD (AAN)-- Parlamentario John Hart, den entrevista cu Matutino DIARIO a amplia acentua riba e tema di seguridad den trafico, y kico falta na Aruba cu cada dia tin nos trafico mas insigur.
El a menciona e accidente fatal cu a sosode siman pasa na Pos Chikito y numa, Diamars di e siman aki, otro accidente a tuma lugar, kiermen ta na orden di dia cu hopi accidente ta tumando lugar.
“Kiermen, nos tin cu bay atende cu esaki, y nos a pasa un ley pa loke a trata ‘Fondo di Inversion’ y e ley aki ta pone e prioridad pa gobierno bin cu un agenda, pa bin cu proyectonan. Anto, di akinan, Parlamento ta bay vigila p’asina aki Husticia por haya mas impulso tambe den finanzas pa por inyecta esaki tambe, por ehemplo, riba e tema di seguridad den trafico.
“Laga mi ta hopi enfatico. Aruba tin necesidad tur caminda. Awo nos ta tratando, por ehemplo, e tema di KIA. E situacion na KIA ta deplorable. Pero ora nos wak e situacion di Ouderenzorg, tambe mester miyones. Pa seguridad den trafico, nos mester di hopi polis. Nos no tin suficiente placa; kiermen, lo yega momento cu nos mester bay tuma cierto decisionnan, p’esey mi ta contento cu e ley di Fondo di Inversion a pasa, pero aworaki gobierno mester bin cu un agenda di proyectonan cu lo bay cana via Begrotingsfonds, na Raad van advies pa bin cu conseho, bin bek Parlamento pa akinan, nos como Parlamento por duna cierto direccionnan”, John Hart a señala.
El a agrega cu e direccion cu e kier pusha sigur, ta pa den e cadena hudicial para keto riba e aspecto aki specifico pa seguridad den trafico, haya mas atencion.
