ORANJESTAD (AAN): Dialuna durante un evento riba e intencion di Hulanda pa pidi disculpa pa su pasado di esclavitud, Prome Minister di Aruba Evelyn Wever Croes a hiba palabra, despues cu Prome Minister di Hulanda Mark Rutte a tene un discurso na Hulanda, cu tur esnan presente na Renaissance Convention Center por a mira y scucha riba un
pantaya grandi.
E discurso di Prome Minister Wever Croes tabata lo siguiente:
Awe ta un dia historico, un dia cu hopi di nos a antepasadonan a soña cu lo bira realidad.
Awe gobierno Hulandes ta reconoce cu esclavitud tabata un crimen contra humanidad y ta ofrece disculpa pa esaki.
Pero e no ta keda na awe so, of na un disculpa so.
Hulanda a indica cu lo cana hunto cu Aruba y e demas pais y islanan cu tabata su colonianan, pa yega na un trayecto di restaura, recupera y reconciliacion.
Apesar cu nos a wordo sorprendi cu e intencion aki ni dos luna pasa y apesar cu nos lo a prefera di ta mas envolvi den e proceso importante aki, nos ta considera e dia di awe un paso historico, pasobra un disculpa sincero semper ta uno bon bini.
Nos por mira cu ainda rasgonan di esclavitud den nos pais, den Reino y den su institutonan.
Den e trayecto nos dilanti, tanto na Aruba como tambe den Reino, nos lo envolve mas tanto organizacion posibel, tambe nos Parlamento y otro institutonan.
E intencion di Gobierno di Aruba ta pa 1 di Juli 2023, momento cu nos ta conmemora y recorda 160 aña di esclavitud cu a kibra e cadena di esclavitud den Reino, cu nos tin un plan concreto con e proceso di restaura, recupera y reconcilia lo ta pa Aruba.
Recomendacionnan con pa haci esey tin de sobra.
Aña pasa e asina yama ‘dialooggroep Slavernijverleden a entrega e rapport: ‘Ketenen’ na gobierno di Hulanda y Caricom tambe a publica un lista di 10 recomendacion, Caricom Ten Point Plan for Reparatory Justice,
From Apology to Action, pues tin hopi idea.
Nos no por cambia historia, pero nos generacion tin e oportunidad unico awor pa coregi esaki y haci lo corecto.
Di disculpa pa accion.
Conta cu nos lo tene Gobierno di Hulanda na su palabra duna awe.
