Parlamentario Stephany Sevinger:
ORANJESTAD (AAN) — Inversion den infrastructura ta toca directamente e bida diario di ciudadano. Caminda, scol y edificionan publico tin mester di mantencion continuo, y ora e trabou aki keda atras, e costo pa recupera nan ta bira mas grandi. Esaki ta e punto central cu Parlamentario di AVP, Stephany Sevinger, a trece dilanti durante e tratamento di e proyecto di ley pa Fondo di Inversion y Desaroyo den Parlamento di Aruba.
Sevinger a responde na e cuestionamentonan di oposicion tocante e necesidadnan di pueblo y si inversion den infrastructura realmente ta beneficia ciudadano. Pa e parlamentario, e debate mester tene cuenta cu e deterioro di infrastructura ta un proceso cu ta desaroya durante tempo.
“Un caminda no ta deteriora di un dia pa otro. Un scol no ta yega na un condicion cu ta exigi renobacion grandi di un dia pa otro. Un edificio publico no ta cuminsa tin problema structural di un dia pa otro”, Sevinger a expresa.
Segun e parlamentario, pa compronde e inversionnan cu ta necesario awe, mester evalua tambe e trabounan cu no a wordo ehecuta y e mantencion cu no a wordo duna durante e gobernacion anterior.
“Nos no mester papia solamente di cuanto nos ta gasta awe. Nos mester compronde cu awe nos mester gasta mas pa por recupera loke no a wordo haci, ni manteni den gobierno anterior”, el a enfatisa.
Sevinger a critica loke e ta considera un contradiccion den e postura di oposicion: ta papia di e dolornan di pueblo, mientras, segun su evaluacion, decisionnan y falta di continuidad durante su propio gobernacion a contribui na e necesidadnan cu Aruba ta enfrenta actualmente.
Pa Sevinger, un di e propositonan principal di e fondo ta pa evita cu proyectonan destina pa pueblo keda para of sin termina pa motibo di ego of diferencia politico. E ta considera cu e continuidad di proyecto mester basa riba e necesidad di comunidad, y no riba ken a inicia e proyecto.
E parlamentario a señala cu e falta di continuidad ta afecta ciudadano directamente. Ora un proyecto necesario no ta sigui, e necesidad ta keda y e comunidad ta sigui warda riba e mehoracion.
Sevinger a expresa tambe preocupacion cu diferente gasto contempla ta relaciona cu necesidadnan basico cu, den su opinion, mester ta inclui den e presupuesto regular di gobierno.
Como ehempel, el a menciona e plan di mantencion di caminda pa varios aña y e mashinnan cu Departamento di Obra Publico (DOW) tin mester pa ehecuta su trabou. Pa e parlamentario, esakinan ta parti di e tareanan esencial di e departamento y nan financiamento mester ta ancra den su propio presupuesto.
Sevinger ta considera preocupante cu mester clasifica e necesidadnan aki como inversion y busca financiamento den un otro fondo pa sigura cu nan por wordo atende. Segun su evaluacion, si DOW mester depende di recurso adicional pa cumpli cu su tareanan regular, esaki ta indica cu su presupuesto no ta suficiente pa cubri e necesidadnan di e departamento.
E parlamentario ta subraya cu e debate tocante Fondo di Inversion y Desaroyo mester atende tanto e recuperacion di infrastructura como e financiamento di su mantencion continuo. Pa Sevinger, e responsabilidad ta pa recupera loke a keda atras, duna continuidad na proyectonan pa pueblo y sigura cu e departamentonan tin e recurso necesario pa cumpli cu nan trabou.
