ORANJESTAD (AAN): Segun Partido AVP, segun e reaccionnan cu ta drenta cerca nos e ta evidente cu no ta cuestion di algun cas pero ta henter Aruba a worde azota cu e cuentanan astronomico di awa y coriente.
Hopi caso cu nos a constata den hogarnan di nos pueblo ta comparti cu nos nan cuentanan cu a subi dobel di locual e tabata ta luna pasa. Algo cu ningun famia ta prepara pe.
Tur esaki ta bini riba un aumento barbaro caba di costo di bida. Ariba esaki ta bini awor e aumento di BBO y cu AZV no ta pagando pa tur remedi mas.
AVP ta lamenta cu Aruba ta haya nan mes mas y mas confronta cu un pobreza creciente y alarmante. Costo di bida y gastonan pa subsistencia di un famia a conoce un aumento dramatico desde 2017. Medidanan cu Gabinete Wever-Croes a implementa durante e ultimo añanan a impacta e cifra di inflacion severamente. Na 2017 ainda inflacion tabata -0.6%. Despues di 2017 inflacion a keda subi so y tur prognostico ta mustra cu e aña aki inflacion ta sigui un rumbo devastador.
Mientrastanto cifranan di CBS di 2022 compara cu December 2017 ta mustra cu e bestaansminimum pa un famia a aumenta cu 900 Florin pa un famia di 4 y 500 Florin pa un solo persona. Pa un persona e bestaansminimum tabata 2066 Florin na 2017 y a bira 2513 Florin na 2022. E bestaansminimum pa 4 persona, 2 adulto y 2 mucha a aumenta na 2022 cu 900 Florin pa luna desde 2017. E tabata 4338 Florin y a bira 5278. Esaki no ta inclui ainda ni e impacto di aumento di BBO y aumento di awa y electricidad y mas otro medidanan di Gabinete Wever-Croes. Ta cua famia a bay dilanti cu 900 Florin pa luna e ultimo 5 añanan aki di Gabinete Wever Croes pa por paga pa e aumento dramatico aki ?
Segun AVP, e empobrecimento na un forma alarmante ta causa un sinfin di sufrimento, ta impacta salud di nos ciudadanonan, ta crea problemanan social y ta fomenta criminalidad. P’esey ta incomprendibel cu gobierno ta hiba un maneho di medida tras medida sin percura pa correccion efectivo di e poder di compra.
AVP ta insisti, cu hopi di e aumentonan exorbitante aki por a worde evita si Gabinete Wever-Croes a hedge y a sigui cu e programa di expansion di energia renobabel di nos gobierno.
Fraccion di AVP den Parlamento ainda ta warda e reunion cu nan a pidi, pa gobierno bin splica unda e 1.8 miyard fia di Hulanda y cobra extra na redoblacion di BBO a bay mientras pueblo ta sufriendo. Aki ta unda pueblo kier pa su voz y clamor por resona, pasobra asina no por sigui.
