Negoshinan na Aruba ainda ta hopi fragil
ORANJESTAD (AAN): Desde e momento cu nos a mira den presupuesto 2022 cu Gabinete Wever-Croes ta bay cobra “loon-subsidie” back di empresanan cu ‘supuestamente’ a haya di mas, Partido AVP a alerta pa e forma con ta bay haci esaki.
Tur hende por a mira den presentacionnan di Gabinete Wever-Croes ta bay cobra back, pa medio di SVb, mas di 80 miyon Florin for di empresanan mediano y chikito. Segun Gabinete Wever-Croes mas di 1.800 empresa inhustamente a haya mas “loon-subsidie” cu nan tabata tin derecho riba dje.
Na momento cu Gabinete Wever Croes a anucia e cobramento back aki nos a expresa cu nos ta teme cu hopi negoshi na Aruba no ta prepara pa por bay sobrebibi sin “loon-subsidie” corda bay paga back e sumanan cu Gabinete Wever-Croes ta menciona, anto den un termino di dos aña,
Den Parlamento Gabinete Wever Croes a bin anuncia durante tratamento di e ley di “loon-subsidie” cu lo bay na cobra e empresanan aki, pasobra segun calculacion cu a haci via departamento di impuesto e empresanan aki a haya demasiado salaris subsidie.
AVP cu a haci e alerta, ta kere cu tin di atende e asunto aki cu hopi cautela, pasobra negoshinan ta hopi fragil na e momentonan aki.
Partido Berde a hasta referi na loke a pasa na Hulanda, con un proceso asina di cobra mayornan back sumanan di “kindertoeslag” cu supuestamente nan a haya dimas of no tabata tin derecho riba dje a desemboca den un proceso hopi inhusto den cual miles di famia a bira victima. For di esaki a sali un rapport devastador bao di e titulo “Ongekend Onrecht”. Un inhusticia nunca bisto, tabata e conclusion di e investigacion parlamentario, ta locual a worde cometi contra miles di famia inocente”.
Awe na Aruba tin un situacion alarmante, “ongekend onrecht” ta tumando lugar cu negoshinan chikito y mediano cu un cobramento feroz cu ta bay desemboca cu negoshinan mester bati bancarota pa motibo di e forma con Gabinete Wever-Croes awor kier cobra loon-subsidie back.
AVP a bisa cu nan a tende di sumanan entre 50.000 Florin te cu 350.000 Florin cu ta cobrando empresanan chiquito y mediano. Gobierno a core campaña cu FASE y “Loon-Subsidie” y awor ta bati na porta di tur hende pa paga back.
“Ongekend Onrecht”, ta bira amargo realidad awor na Aruba. AVP ta lamenta cu Gobierno di Wever-Croes no kier realisa cuanto nan a perhudica y chica e pueblo caba.
