Parlamentario Marco Berlis (MEP):
ORANJESTAD (AAN): Den e ultimo simannan aki tabata tin hopi pero hopi desaroyonan cu a sacudi y expone e fundeshi di AVP fuertemente. Duro AVP a wordo sacudi y laga blo sunu pa e bosnan di ex-candidatonan y parlamentarionan cu a rechasa y condena e liderasgo di Mike Eman cu ta insisti pa cultiva, brasa y promove corupcion.
E ex-candidatonan aki a dicidi pa vocifera tur e berdad di e partido cu nan tabata afilia na dje pa henter comunidad por compronde y scucha kico ta cushina den Cas di Partido lidera pa Mike Eman. Pa basta tempo e ex-candidatonan a tolera e actitud aki, sinembargo, hasta nan no por a kere ora cu Mike Eman y e Old Boys di AVP a sali festeha na grandi e condena di Benny Sevinger 14 di April ultimo. Esaki tabata e ultimo druppel di realidad anto den cara di henter pueblo: “AVP ta celebra corupcion!” Sin ningun berguensa y consenshi Mike Eman a mustra pueblo cu e no ta un lider cu ta pone ordo, sino un lider cu ta promove desordo y corupcion.
Un Exodus grandi for di partido AVP: For di e tempo ey, henter pueblo ta observando con AVP ta desintegrando nan dilanti. Prome tabata dr. Ryçond Santos do Nascimento cu no a falta palabra pa describi pakico e mester a sali for di AVP. Su denuncia con e partido ta entretene y festeha corupcion na grandi, ta strategia den mentira y descepcion, y no tin un compromiso cu integridad, a resona fuerte den e medionan social y prensa pa varios siman. Hasta un persona cu djis un tiki principio simpelmente no por keda mas cu AVP. Despues tabata Muzannin cu tambe a retira citando su motibo simplemente cu e no por keda mas cu AVP mirando e corupcion cu e partido ta para pe. Nos sa for di declaracionnan haci di Ryçond y Gerlien cu e hala nobo no tin espacio pa wordo scucha, no tin lugar pa ideanan nobo ni reforma den e partido. E Old Boys ta keda goberna den e partido berde manera nan kier! Muzannin, a retira, y tambe a expresa cu AVP a perde su caminda.
Gerlien Croes: tampoco por a keda mas. Mester remarca cu riba medionan social e 3 candidatonan aki a haya hopi comentario di AVPistanan cu a keda defrauda, rabia cu partido y cu tambe a bisa cu nan ta laga los di e partido corupto ey. Asina nos ta wak cu e exodus no ta solamente den candidato pero tambe den activista. Ainda asina Mike Eman ta keda papia di e “bon comun!” Pueblo, di kico Mike Eman ta papiando? Brasamento di corupcion comun? Hunga populismo comun? Creando un Old Boys network comun?
Partido AVP lo sigui krimp pa via di brasa corupcion: No ta un secreto cu AVP a perde 15.000 voto den dos eleccion, y manera nos ta wak e exodo di mas grandi den historia di AVP, partido di corupcion, ta tumando lugar ta pronostica cu lo perde 5-10mil voto mas. Sigur considerando e magnitud di e escandalo y realidad di e partido berde cu ta tumando lugar. Tambe nos ta wak cu AVP a bay di 7 pa 5 asiento. Awor den Parlamento e partido grandi den oposicion a perde 30% di su asientonan. Caya ta papia cu tin mas na caminda. Hopi hende ta rabia y disgusta, mientras Mike Eman ta core saca potret cu 20 hende y ta haci manera tur cos ta normal. Gerlien a bise cos manera ta: “Tin un division y kiebro grandi den AVP!”
Mike Eman y AVP: “Een Dalende Lijn!”: Hecho ta cu Mike Eman no por a salba su negoshinan, ni su mes partido, ni su integridad, y ni su liderasgo. Bo a bay atras 15mil voto Mike, bo a perde 2 asiento Mike, bo a perde 3 candidato y mas na caminda Mike, bo a perde miles di activista Mike, y ba perde bo credibilidad y consenshi comun na caminda Mike. E ta tempo pa bo tuma bo retiro y keda cas manera bo gusta haci normalmente, pasobra ni na trabao bo no ta presenta mas. Ba sink Aruba un biaha caba, awo destino mes ta mustra bo cu ta tempo pa bay cas. Mike Eman y corupcion,…nunca mas!
