Parlamentario Marco Berlis (MEP):
ORANJESTAD (AAN): E palabra integridad e perde tur balor y respet den boca di hopi politiconan. Specialmente ora ta exigi integridad di otronan, pero nunca kier aplica esaki pa nan mes. AVP ta hacienda reunionan y ta scibiendo articulonan di e “bon comun.”
AVP a menciona cu e bon comun mester inclui tur plataforma incluyendo esun politico. Si esaki ta berdad anto e ora ta bon pa AVP cuminsa splica pueblo pakico nan semper ta vota y ta rechasa cualkier forma, ley of plan pa fortalece integridad den nos comunidad y Parlamento. Pasobra sin integridad boso bon comun no tin “sentido comun.”
E “bon comun” ta contra ombudsman: Ora bo broma cu e bon comun y exigi integridad pero abo mes ta vota contra di e ombudsman, e Defensor di pueblo, anto bo ta hustifica esaki cu mentira y politikeria. Nos ta e unico pais den reino cu no tin un ombudsman.
A presenta un comision special pa ombudsman, a yega na un acuerdo mutuo y a aproba e landsverordening. Ora mester a ancr’e den nos Staatsregeling a hunga wega politico pasobra nan no kier e Defensor di pueblo! Fraccion di AVP y oposicion a rechasa esaki! Esaki ta e bon comun cu boso ta papia di dje? Boso a kita derecho y autoridad di pueblo pa defende nan mes y busca nan derecho pa boso por hunga boso weganan sin sentido comun!
E “bon comun” ta contra integridad: Siman pasa nos tabata tin un reunion central den cual mester a vota pa participa y duna forma na un posibel ley cu lo fortalece integridad den gobierno y parlamento di Aruba. A invita tur parlamentario pa hunto duna contenido y forma na e ley aki.
E intencion di e ley ta pa hiba transparencia y integridad na un nivel halto den nos parlamento y gobierno. E iniciativa aki a worde bari cu hopi actitud y burla for di mesa pa oposicion y ta claramente bisto cu no kier para pa integridad y e bon comun.
E bon comun ta otro “slogan”di un campaña pa trata na sconde y camufla AVP su imagen “golpia.” Ora bo ta grita bon comun eyfo y tur bo accionan ta contra di esaki, ta pasobra AVP no tin niun “sentido comun.” Integridad ta bon pa tur otro hende menos pa AVP.
E “bon comun” ta contra solucion berdadero: Ora cu AVP a vota contra di desaroyonan necesario y esencial di RWZI pa pais Aruba, di berdad boso a pensa riba e bon comun? Ora bo a goberna 8 aña largo y inverti 1 miyon so den RWZI y a malgasta 4 Biyon Florin, esey ta e bon comun?
Ora cu bo a campaña na 2021 y bo programa di gobernacion no a contene ni un frase y ni un intencion pa soluciona e situacion na RWZI, esey ta e bon comun? Asina mes bo a manda politiconan bay hunga politica cu e situacion mientras AVP mes nunca a haci nada, esey ta e bon comun? Esey ta integridad? Pesey AVP mester corda cu e bon comun mester bin tambe cu “sentido comun!” (Common sense.).
