ORANJESTAD (AAN): Fraccion di AVP a bolbe reitera nan intencion pa sigui lucha pa pensionadonan na Aruba haya un mihor aumento.
Nan opinion ta cu ta imposibel pa pensionado cu ta biba di un entrada di pensioen so por tin un bida digno cu e costo di bida actual. Sea e pensioen di SVb mester worde aumenta considerablemente of gobierno tin cu aumenta e reparatietoeslag cu AVP a introduci pa cada pensionado considerablemente”, asina e lider di AVP, mr. Mike Eman a expresa despues di un analysis profundo di cifranan y papiando cu pensionadonan.
Pensionado cu deficit tur luna: Segun AVP, e cifranan ta papia pa nan mes. E dolor cu nan ta scucha di e pensionadonan ta worde confirma pa e cifranan di CBS y SVb. Tanto e pensionado soltero como pareha ta core cu un deficit grandi tur luna.
Den su relato final pa aña 2022 CBS a duna di conoce cu un persona adulto mester di 2.560 Florin minimal pa luna pa un sobribencia digno. E pensioen di un soltero segun cifranan di SVb ta 1.215 Florin pa luna. Esaki kiermen cu un pensionado soltero cu ta biba su so ta core cu un deficit di 1.345 Florin pa luna.
Dos persona adulto, pues por ehempel un pareha pensionado mester, segun CBS, un entrada di 3840 pa luna. E pensioen di un pareha segun cifranan di SVB ta 2,046 Florin pa luna. Esey kiermen cu un pareha pensionado cu ta biba nan so ta core cu un deficit di 1794 Florin pa luna. Pa AVP, esaki ta imposibel y inhusto pa laga e situacion penoso aki asina.
AVP ta convenci cu pesionadonan ta sufriendo ecomicamente y ta bibando abandona door di un gobierno cu ta subi gastonan tur luna pa pueblo, pero gobierno no ta puntra su mes con nos hendenan por sobrebibi. Segun SVb tin 22.164 pensionado na Aruba. E cifranan aki ta mustra cu un gran mayoria ta bibando den un situacion inhusto. E situacion aki ta hopi penoso tambe pa esnan cu salarionan bao di 3.500 floriin, pesey miles di hende tin dos trabao. Esaki tambe ta un bida inhusto y cu consecuencia pa salud fysico y social di e persona y di su famia. AVP ta mira cu hopi pensionado tambe cu por ainda y logra di haya algo extra tambe ta esforza nan mes pa sobrebibi.
AVP kier bin cu cambio, sea e placa di pensioen mester worde aumenta considerablemente of e reparatietoeslag cu gobierno di AVP a introduci mester worde aumenta substancialmente. Segun AVP, ta ora awor pa gobierno bin cu un aumento substancial di entrada mensual pa nos pensionadonan.
