Na opinion di Endy Croes di MEP:
ORANJESTAD (AAN): Den transcurso di diahuebs y diabierna ultimo, Parlamento di Aruba a trata e prome Presupuesto Supletorio di aña 2026 den un reunion publico. Croes a remarca cu normalmente e presupuesto aki mester a wordo trata desde mita di aña, alrededor di juni, mientras cu e di dos presupuesto supletorio ta keda trata na fin di november of inicio di december.
Segun e parlamentario, e situacion actual ta nifica cu e gobierno a gasta gran parti di e recursonan aki caba den e prome mita di aña, y awor den luna di november ta bin pidi aprobacion di Parlamento pa fondo cu ya a wordo uza. Maske e tipo di maneho aki no ta nada straño ni nobo di parti di AVP, e postura di e partido Futuro, kende a priminti un politica nobo, si a laga nos babuca.
Kico a pasa cu Mike de Meza: E tension entre e partidonan di coalicion a escala rond di un iniciativa di Mike de Meza.
Durante e debate, e parlamentario Mike de Meza tabatin e intencion di presenta un mocion pa busca un solucion pa e discusion rond di e bestaansminimum. E propuesta tabata pa introduci un aumento di sueldo minimo per direct pa entrante 1 di januari 2027, ofreciendo e comerciantenan e opcion pa deduci e costo aki for di nan BBO.
E meta di De Meza tabata pa calma e tension di e ultimo simannan entre AVP y Futuro, mientras cu na mes momento e tabata stipula e ruta pa yega na mas aumento den un futuro cercano. E propuesta aki tabata den mesun liña cu e postura di Prome Minister Mike Eman, kende den prome tanda a critica e fraccion di Futuro fuertemente, argumentando cu tur e rapportnan necesario ta existente caba y cu mester a aumenta e sueldo minimo fo’i ayera.
Minister Gerlien Croes a opone: Segun Parlamentario Croes, durante e reunion e Presidente di Parlamento mester a schors e reunion continuamente pa AVP y Futuro purba yega na otro riba e mocion, como cu Futuro no tabata di acuerdo cu esaki.
E discusion den e fractiekamer a escala te na gritamento. Den e ambiente tenso aki, Minister Gerlien Croes di Futuro a opone rotundamente, menazando cu e gobierno lo cay si e mocion di De Meza wordo poni pa votacion den e forma cu e tabata, indicando cu nan mester di mas tempo pa e proceso.
AVP a sucumbi pa mantene e gobierno: Den oranan laat di anochi, AVP a informa Mike de Meza cu nan no por sostene su mocion pa evita cu e gobierno ta cay. Croes a remarca cu e prioridad di parlamentarionan manera Bermudez, Hart y Kelly tabata simplemente e temor di perde nan salario si Gerlien ranca e plug.
Mirando e falta di apoyo di su fraccion, Mike de Meza a tuma e decision di declara su mes independiente, poniendo un fin na e situacion dificil cu el a bin ta pasando aden den e partido desde 2025. El a bay pafo y a anuncia den prensa cu e ta distancia su mes di AVP, expresando claramente cu esaki no ta e partido cu e tabata conoce.
Endy Croes a cera su declaracion criticando e falta total di respaldo di su coleganan, señalando cu ni un solo parlamentario di AVP a baha pa dun'e sosten moral durante su anuncio publico. Croes a califica e trato aki como un falta di gratitud profundo pa un politico cu a sirbi AVP y Aruba pa mas di 8 aña como Minister y 8 aña como Parlamentario, catalogando e echo aki simpelmente como "dieptriest".
