Parlamentario Jennifer Arends-Reyes
ORANJESTAD (AAN): Aruba Tourism Authority (ATA) a presenta recientemente su Plan Corporativo y Presupuesto pa 2026 na Comision di Turismo den Parlamento, caminda a comparti e vision y direccion strategico pa desaroyo di turismo na Aruba den e proximo añanan.
Durante e presentacion, ATA a enfatisa cu turismo pa Aruba no por sigui midi solamente na cantidad di bishitante, sino tambe na calidad di e impacto economico, social y ambiental cu turismo ta trece pa nos comunidad. E plan ta basa riba un cambio di enfoke cu ta pone mas atencion riba “high-value, low-impact tourism”.
ATA a splica cu e Corporate Plan & Budget 2026 ta enfoca riba cinco pilar principal: calidad di bida y lugarnan publico, calidad di experiencia di e bishitante, impacto economico sostenibel, proteccion di medio ambiente y herencia cultural, y fortalecemento di e organisacion mes.
Entre e iniciativanan concreto presenta na e comision, ta e intencion pa inverti mas den maneho di destinacion, diversificacion di productonan turistico manera turismo cultural, culinario, bienestar y naturaleza, y tambe uzo di data y analisis digital pa drecha decisionnan mas efectivo y responsabel.
E presentacion a lanta pregunta y reflexion di parti di miembronan di parlamento, cu a pidi mas claridad riba distribuimento di presupuesto, manera con lo midi e impacto riba comunidad local, y con ATA lo traha riba strategianan presenta.
Segun Parlamentario Arends-Reyes, den calidad di presidente di Comision di Turismo, e ta di opinion cu e presentacion ta un paso importante pa un dialogo mas profundo entre gobierno, parlamento y sector turistico, cu e obhetivo pa sigura cu turismo sigui ta un motor economico fuerte, pero tambe uno cu ta respeta e bienestar di pueblo Arubiano y e sostenibilidad di nos isla.
{gallery}ATA a presenta su Corporate Plan Budget 2026{/gallery}
