Parlamentario independiente Gerlien Croes:
ORANJESTAD (AAN) – Segun Parlamentario Independiente, Gerlien Croes, Aruba tin hopi necesidad y mester di cambionan drastico, pasobra e pais no por sigui opera di e forma aki. Asina e dama a expresa den entrevista cu DIARIO.
El a subraya cu ohala riba e Dia di apertura di Aña Nobo di Parlamento, lo a sirbi pa reflexiona y alavez realiza nan mes e cambionan grandi cu mester sosode den Parlamento, den e forma con ta goberna e pais aki, y cu Comunidad por haya un aire fresco un biaha mas.
E parlamentario a recalca cu e peso financiero ta drastico pa nos comunidad y esey por mira den e ultimo lunanan, e necesidad cu tabata tin cu apertura di e aña escolar mes. Tabata tin hopi mayor cu tabata en busca di ayudo financiero, hopi material cu no por a afford pa e muchanan. “E maneho financiero di e pais aki por haci un diferencia hopi grandi. E simple hecho di tuma un decision concreto cu no ta bay costa pueblo mas, financieramente.
Ban cuminza na papia di un espacio cu por crea pa negocia debidamente cu Hulanda, na un interes mas faborable, entre otro. Pero tambe mi ta kere cu na final di dia e gastonan operacional di gobierno, ainda ta keda halto; gastonan innecesario, por ehemplo autonan di luho cu hasta presidente di Parlamento ta haci uzo di dje. Nan ta wordo tilda como argumentonan politico, pero mi ta kere cu tin otro prioridadnan na e momentonan aki tambe”, Gerlien Croes a comenta.
El a agrega cu politico y parlamento como representante di pueblo, mester haci e mesun sacrificionan cu pueblo ta haci y aworaki aki mas cu nunca, Aruba merece un forma di goberna decisionnan mas estricto, cu no ta popular, pero cu despues por duna un miho fruto pa futuro.
