Mocion aproba pa Parlamento
ORANJESTAD (AAN): Durante e tratamento di e ley di aumento di sueldo minimo, lider di MEP, Evelyn Wever-Croes a entrega un mocion pa cambia e siman di trabao di 5 dia, pa 4 dia. Esaki tabata un punto importante den MEP su campaña electoral, y henter Parlamento a aproba e mocion.
“Varios pais ya a ehecuta un proyecto piloto cu exito, entre otro Hulanda, unda a mustra cu un siman di trabao mas cortico por yega na mas productividad, mas satisfaccion den trabao y un mihor balansa entre trabao y bida personal. “Mi ta di opinion cu Aruba por siña for di e experiencianan aki y modernisa su structuranan laboral” lider di MEP Evelyn Wever-Croes a cuminsa bisa den su disertacion.
El’a sigui elabora riba e beneficionan multiple. Un mihor balansa entre trabao y bida personal ta duna trahadonan mas tempo pa famia, pa salud y crecemento personal.
Investigacion internacional ta mustra cu empleadonan cu traha menos dia pa siman, ta traha mas eficiente den menos ora, y pues tin mas productividad.
Un otro beneficio ta cu lo tin menos ausentismo y menos stress, pasobra si e trahador tin mas momento di descanso, esey ta baha cantidad di AO (ausencia pa malesa) relaciona cu stress.
Tambe e ta haci e mercado laboral mas atractivo. Aruba ta bira mas competitivo pa atrae y retene talento, pa trece nos hobennan back di exterior, specialmente hoben profesionalnan.
“P’esey nos a pidi pa Gobierno sirbi como ehempel: Si sector publico cuminsa cu e maneho aki, Gobierno ta pone un tono positivo pa henter sociedad. Nos a pidi Gobierno pa haci e estudionan necesario, y informa Parlamento dentro di 3 luna con lo ehecuta e cambio importante aki. Mi ta hopi contento cu Parlamento a aproba e mocion importante aki. Nos a priminti durante campaña pa introduci siman di trabao mas cortico, y desde oposicion nos lo sigui lucha pa esaki. Gobernando desde oposicion”, Evelyn Wever-Croes a duna di conoce
