PPA ta premira:
- Pregunta cardinal si acaso ‘Principionan lo keda negocia?’
ORANJESTAD (AAN): Transparencia, confianza y honestidad ta e base pa cualkier gobierno sincero cu ta respeta su mes y e pueblo, asina lider di partido PPA, Otmar Oduber, a duna di conoce.
Apenas na algun ora lew di un constelacion nobo den Parlamento di Aruba cu lo huramenta Diaranson awor, e futuro lider di fraccion di PPA a declara di ta sorprendi con e negociacionnan ta andando pa cu un futuro formacion di e gobierno nobo. Sorprendi pa motibo cu ta constata cu esaki ta worde haci den un secrecia y sin transparencia, un mal pia pa un gobierno sali riba dje.
Nada di cambio: Pueblo a vota claramente pa un cambio y a duna partidonan FUTURO y PPA un voto cla di confianza, mientras a manda un señal cla pa tanto AVP como MEP di no ta contento cu e dos partidonan mas grandi. Tambe pueblo a manda un señal aun mas cla ainda y raspa na e tres partidonan mas nobo den e constelacion anterior, esta RAIZ, Accion21 y MAS, unda a rechasa e tres nan aki na un forma categorico apesar di tabata partidonan relativamente nobo y jong.
Promesanan haci: Sinembargo pueblo tambe a vota pa promesanan haci. Promesanan di baha gasto den gobierno y pa goberna cu no mas cu 7 minister.
A vota pa cumpli cu nos grandinan y aumenta cu 50% nan entrada dentro di e prome 100 dianan di e gobierno nobo.
Pueblo a confia cu lo elimina BBO pa bin cu un sistema mas husto di BTW, unda lo duna back na e pueblo, aumentando nan poder di compra. E pueblo a vota pa un rebaho drastico den e costo di bida y un mihor calidad di salud pa su hendenan.
Segun Oduber, Partido PPA lo vigila di cerca cu e gobierno den formacion ta cumpli cu su promesanan di campaña y ta spera cu no ta defrauda pueblo votador cu a worde priminti cu cambionan drastico mediante un politica nobo y mas husto. E fraccion di PPA lo responsabiliza e gobierno pa cu esaki mediante control profundo y supervision rigoroso den Parlamento.
