Jayburtt Dijkhoff di Fundacion SIKI
ORANJESTAD (AAN): Aruba ta den un circulo vicioso y esaki por worde kibra cu un cos: educacion. Nos mester bira conciente di e peligernan y consecuentemente siña con pa sali for di dje. P’esey mr. dr. Jayburtt Dijkhoff ta haci un yamada na tur politico, consehero, profesional y ciudadano, pa asisti na e curso ‘Con pa goberna un pais’ cu Fundacion SIKI ta organiza riba 3 di september venidero.
Loke ta e situacion? Un situacion financiero precario. Violacionnan di derechonan humano. Ministernan sentencia pa maluzo di poder y soborno. Corupcion y integridad na peliger. Curatela di Landspakket y un futuro financiero-economico-social y di salud insigur. Ta con nos por a yega na e situacion aki? Acaso Status Aparte no a garantisa sa nos e libertad di scoge pa un rumbo di prosperidad y felicidad? Kico a pasa?
Autonomia no ta garantia di bon gobernacion. Tin politico ta bisa campaña ta un cos, goberna ta otro. Ciudadano ta bisa vota pa kico, e payasonan ta cambia pero e circo ta keda mescos? Unda e berdad ta keda? Den mayoria caso e ta keda un caminda mey-mey di dos e extremonan.
Sr. Jayburtt Dijkhoff, presidente di Fundacion SIKI a haci un investigacion y sigui e hechonan. E conclusion ta cu nos situacion ta hopi delicado. Aruba ta den un situacion vulnerabel den tur sentido. Nos constitucion y leynan no ta funcionando manera mester ta. Nan a permiti un stempel parlement (parlamento ta vota pa partido y no pa pueblo), y nan no a hiba na control debido y na un situacion financiero penibel. E cultura politico no ta e tradicion Hulandes di traha cu otro via areglo (compromisonan), sino dominancia y parti cada cartera como un autonomia riba su mes. Fieldad na e elite ta mas importante cu experticio. Critica no ta worde acepta y opinionnan no ta worde valora.
Al contrario, e pais ta dicta kico ta realidad. No ta e hechonan ta importante, sino con e hechonan aki ta worde presenta. Tur e structuranan aki ta hiba na un forma di tirania pasivo. Nos no conoce un dictador, pero e situacion ta asina peligroso cu por lanta un persona hopi carismatico den futuro hopi cercano y e lo por haya un poder absoluto.
Investigacion a mustra cu pueblo no tin confianza den ningun institucion menos den ramo di educacion y religion. Ni cierto prensa tampoco ta di confia, cual ta hopi funesto pa e pensamento liber y libertad di expresion. Riba dje, manehonan no transparante, cu no ta tene cuenta cu minoria y impactonan negativo a hiba na violacion di principionan di bon gobernacion y derechonan humano.
Si Aruba tabata den un klas di bon gobernacion, lo el a haya un rapport cu un Dikke Onvoldoende y lo no por bay over. Pero nos ta wak cu cada eleccion pueblo no ta conciente di tur e aspectonan aki. Esaki tin di haber cu con e sistema ta manipula opinion publico. No ta importa cua gobierno, signatura of mandatario. Tur ta adopta e mesun cultura y forma di pensa. Pueblo tambe den su desesperacion ta busca pa yudansa personal di politico of ta corta tur laso cu politica, haciendo cu nos ta move bay mas ainda den nepotismo y corupcion.
Sr. Dijkhoff ta finalisa cu e yamada pa no warda pa registra pa e curso ‘Con pa goberna un pais.’ Yuda Aruba bay dilanti. Aruba tin mester di bo.
