Jennifer Arends- Reyes #6 AVP
ORANJESTAD (AAN): Enseñansa a wordo hopi neglisha ultimo tempo y ta den un decadencia den su totalidad. Hobennan ta perdiendo motivacion pa sigui studia, maestronan tin hopi aña sin haya e debido atencion. A yega tempo pa nos trece un cambio pero un cambio pa un enseñansa di calidad halto y stabilidad cu prosperidad pa tanto nos hobennan como nos maestronan.
Aruba a mira dos periodo di gobernacion cu hopi recorte, fondonan no debidamente aloca y un structura den enseñansa cu no ta mucho logico. Den e ultimo gobernacion no a mira oportunidadnan nobo pa nos hobennan den Enseñansa cual ta un di e causantenan cu awe ainda tin demasiado hoben studiante ta 'drop out' y drenta mercado laboral of hopi studiante ta bay studia den exterior y ta regresa Aruba sin un diploma y cu debe di estudio pa paga.
Mester crea mas oportunidad pa continua cu un estudio na Aruba mes tambe. 'Life-long learning' ta un slogan cu partido AVP a bin cune pa stimula mas studiante, hoben profesional y adultonan pa sigui desaroya nan mes den nan area. Mester tin e oportunidad igual pa tur hende por crece den nan carera, esaki lo yuda enormemente cu mobilidad social.
Introduci un programa di 'start kwalificatie' pa tur hoben te cu 18 aña por yega na dje. Sa e cualidad di un studiante y dune e sosten, guia y aporte unda cu eta cai corto. Esaki lo ta un gran estimulo pa e studiante caminda eta keda motiva pa keda studia. Reenforsa y percura pa tur yiu di imigrante cu ta residencia na Aruba tin e oportunidad pa participa den nos sistema educacional Hulandes, esaki lo contribui enorme na nan desaroyo cu e idioma pero tambe den nan educacion y pa Aruba tin un generacion nobo cu por contribui na progreso di Aruba. Esaki como parti di e ley di Enseñansa obligatorio pero tambe derecho di mucha na Enseñansa igualmente percura pa tur mucha y hoben cu un of otro discapacidad por keda haya Enseñansa cu por duna nan oportunidad pa ta exitoso den bida.
Pa cada mucha y hoben studiante haya e debido atencion, mester por inverti y pone mas klassenassistent y entre otro mas trahador social na scolnan. Esaki lo contribui enormemente na e bienestar mental di e mucha y tambe hoben. Esaki lo reenforsa e tarea di maestronan pa nan por cumpli cu nan tarea principal. Nos maestronan merece mihor y lo bay traha riba nan aumento salarial cu ta para pa varios aña. Mester por yega na un acuerdo pa un pago di salario husto y igual den balansa cu e trabao duro cu nan ta haciendo como educador.
Mester aloca fondo y percura cu esaki bay debidamente pa drecha e infrastructura di nos scolnan. Un upgrade tecnologico y di energia sostenibel ta indispensabel pa cada scol aki na Aruba. Combersa cu stakeholdersnan pa wak con por yuda e hoben studiante yega na un laptop of computer pa asina e por continua cu su estudio na un manera moderno pero tambe eficiente.
A papia hopi di restaura y yega na un areglo pa cu edificionan di Juliana School y Reina Beatrix, ketobay esakinan ta un ruina y para sin por a hasi uzo di nan, ta oportunidadnan cu ta laga bay y cu ta forma parti di nos comunidad pero sigur por sirbi como un opcion pa aloca un of mas scol sea ta e nivel basico, scol cu preparacion pa un sector specifico of nivel universitario.
E formacion di educacion ta cuminsa for di trempan. Mester inculca un programa di lesamento di buki na scol pa tur mucha por lesa y compronde for di trempan.
