Parlamentario di AVP, Jennifer Arends-Reyes na Tripartite:
ORANJESTAD (AAN): Cooperacion entre e paisnan den Reino mester traduci den mihor servicio y mas oportunidad pa ciudadano. Cu e enfoke aki, parlamentario Jennifer Arends-Reyes, presidente di e Comision di Asuntonan di Reino y Relacion Exterior, a participa como parti di e delegacion di Aruba na e encuentro Tripartite cu representantenan parlamentario di Corsou y St. Maarten.
E encuentro ta ofrece e tres paisnan un espacio pa intercambia punto di bista, atende retonan comun y prepara posicionnan pa e dialogo parlamentario den Reino. Arends-Reyes a destaca cu e intercambionan aki ta importante pa compronde e realidad di cada pais y identifica unda cooperacion por trece resultado concreto.
“Cada un di nos paisnan tin su propio realidad y prioridadnan. Pero tin hopi asunto cu ta toca nos tur. Door di papia cu otro y prepara nos bon, nos por trece nos preocupacionnan y propuestanan cu mas claridad y forsa,” Arends-Reyes a expresa.
Un di e temanan cu e parlamentario a trece dilanti tabata e estado actual di e Landspakket y e siguiente fase di cooperacion den Reino. E reformanan ta toca areanan di importancia pa Aruba, entre nan finansa publico, economia, salud y educacion. Segun Arends-Reyes, e pregunta central mester ta con e esfuersonan aki ta contribui na mehoracion den bida diario di ciudadano.
Den e sentido aki, el a pone enfasis riba e capacidad pa ehecuta e reformanan. Ambicion mester bay hunto cu prioridadnan cla, personal prepara y un schema realista. Alabes, Parlamento mester por sigui e progreso y evalua si e metanan ta wordo alcanza y si e resultadonan ta responde na e necesidadnan di comunidad.
“Nos kier pa e esfuersonan trece mehoracion cu hende por sinti den nan bida diario. P’esey nos mester mantene atencion tanto riba e metanan como riba e posibilidad real pa alcanza nan,” el a señala.
Arends-Reyes a subraya tambe e importancia di un relacion den Reino basa riba confianza, reciprocidad y respet pa e responsabilidad y realidad di cada pais. Pa e parlamentario, cooperacion ta mas efectivo ora tin espacio pa dialogo sincero y participacion di e paisnan den desaroyo di solucionnan.
Su participacion na e encuentro Tripartite ta cay den su responsabilidad pa representa e interesnan di Aruba y contribui na un dialogo parlamentario cu bienestar di pueblo como guia.
“Nos ta sinta na mesa cu un responsabilidad cla: defende e interes di Aruba y contribui na un cooperacion cu ta yuda nos pais sigui dilanti,” Arends-Reyes a conclui.
{gallery}Aruba, Corsou y St. Maarten ta fortifica dialogo y cooperacion na Tripartite{/gallery}
