Glenbert F.Croes :
ORANJESTAD (AAN): Conseho di Partido unanimamente a proclama nos Lider, un biaha mas nos Lider, merecidamente.
Evelyn Wever Croes a hereda un pais na borde di bancarota. Cu su determinacion, vision y amor pa patria, e tabata hibando Aruba den apenas 2 aña di gobernacion na un surplus pa 2020, te ora cu COVID a bati na nos porta 13 di maart 2020.
El a sa di dirigi e pais aki den e peor crisis cu den existencia di Aruba, nos a yega di experencia. Ademas di e pandemia di salud, e crisis financiero cu nos mester a enfrenta. Negoshinan a cera. Hendenan a perde entrada di anochi pa mainta. Gobierno a perde entrada. Evelyn Wever Croes tur anochi incansablemente tabata mantene nos pueblo informa di kico tur ta pasando na y cu nos pais.
E crisis a haci cu mester a actua cu man firme pa evita cu nos pais lo hundi, y nos pueblo hunto cu ne. Como sifuera poco, ora cu nos a bati na porta di madrepatria pa ayudo, nan a bin cu un cantidad di exigencia cu lo a exigi esfuerso sobrehumano pa cumpli cu nan. Evelyn Wever Croes, como un berdadero lider, a lora manga y cuminsa negocia. Ora tur otro a grita: “firma pa caba”, el a para firme. Y awe nos ta wak y biba e frutonan.
Mientras tanto Aruba ta brotando y briyando di energia positivo atrobe, cu un comercio den pleno recuperacion, turismo surpasando tur expectativa, un gobernacion stabiel, nos Lider trahando incansablemente pa trece recuperacion den cas, paz y progreso pa nos Pueblo.
Pa tur e motibonan aki y mucho mas, nos Lider di Partido, e Lider di nos pais como e votegetter di mas grandi, ta pa aclamacion unanime e Lider pa sigui dirigi nos Partido y nos Pais.
