ORANJESTAD (AAN): Parlamentario Endy Croes a splica cu 20 Parlamentario di Parlamento # 11 a huramenta diahuebs ultimo.
Diahuebs exactamente pa 10 or di mainta a inicia un acto di Huramentacion den sala di Parlamento.
/// Eleccion di 25 di Juni a determina su Parlamentarionan nobo:
Eleccion di 25 di Juni ultimo Aruba a celebra democracia unda Aruba den e proceso aki a escoge su 21 miembronan di Parlamento. Asina MEP a saca 9 asiento, AVP 7 asiento, RAIZ 2 asiento, MAS 2 asiento y Accion 21 a logra 1 asiento.
Asina a conclui e resultado final 9-7-2-2-1. Sinembargo den partido AVP esaki a trese hopi confusion momento cu Mike Eman mes a pidi pueblo pa vota pa Benny siendo sera den KIA y aunke Benny a bay atras cu mas di 1000 votos personal el a logra saca su mes. Door di esaki Robert Candelaria ( e Pastor y Polis cu ta papia di integridad) mester keda pafor di Parlamento y awor ta enbuska di un otro trabou. Lagando problema interno di AVP un banda nos a continua.
/// Parlamento # 10 a despedi diaranson 7 di Juli:
Diaranson ultimo tabata tin e delaster reunion di Parlamento # 10 unda tur Parlamentarionan por a hiba un disertacion al respecto nan experencia ultimo 4 aña nan. Locual a resalta cu Parlamento # 10 su nivel a subi considerablemente.
Juan Ady Thijsen como Presidente a percura engrandemente pa esaki. No a permiti hendenan bin tira bals, scupi, hasta Benny Sevinger tempo di AVP a zwaai cu cotex den Parlamento. Tur esakinan a wordo para e mesora Bo tabata wordo saca for di edificio y asina siña debati riba contenido.
Pues e historia con AVP a maneha Parlamento 2010-2017 a bay pa pasado. Na ultimo Parlamento # 10 a wordo desolvi diaranson ultimo despues cu un comision a aproba credincialnan ( geloofsbrieven) di parlamentarionan cu a wordo eligi 25 di Juni.
Na e momentonan ey di acuerdo cu reglamento den Parlamento e Parlamentario cu tin mas hopi aña sirbiendo pueblo como Parlamentario ta esun encarga pa tuma e posicion di Presidente di Parlamento over pa un rato te ora yama e siguiente reunion pa eligi un Presidente y Vice presidente nobo.
Asina Mervin Wyatt Ras a tuma e funcion di Presidente di Parlamento desde diaranson te cu diahuebs merdia momento a yama un reunion y Edgard Vrolijk a wordo escogi como Presidente di parlamento mientras Ursell Arends a bira e Vice Presidente.
Pa Ley dado caso cu Mervin Wyatt Ras no tabata presente e ora ey e persona di mas edad lo a take over. Parlamentario Endy Croes ta termina felicitando Edgard Vrolijk y Ursell Arends cu nan funcionnan nobo mientras ta gradici Mervin Wyatt Ras pa eherce e Funcion temporario desde diaranson pa diahuebs cumpliendo asina cu Ley y democracia.
