Evelyn Wever-Croes: - Arends: "Cu MEP y RAIZ lo bin un era nobo den politica"
ORANJESTAD (AAN): Faro Blanco Lighthouse tabata scenario di e firmamento di declaracion di intencion pa formacion di Gobierno 2021-2025 entre e partidonan Movimiento Electoral di Pueblo (MEP) y RAIZ.
Evelyn Wever-Croes acompaña di Ursell Arends, lidernan di MEP y RAIZ, a yega na un acuerdo di intencion pa sigui negocia pa un coalicion. Ya caba Diahuebs tempran, dilanti di informadornan a firma un acuerdo di intencion pa yega na un coalicion.
E partidonan a yega na e conclusion cu tin similaridad pa goberna hunto. MEP y RAIZ a yega na otro den lineanan grandi.
Den oranan di anochi a firma un di dos convenio pa asina por yega na un gobierno stabil basa den puntonan di enfoke.
Arends di su banda a expresa cu RAIZ y MEP tin varios meta comun cu Aruba lo beneficia di esaki. Ambos partido kier wak continuidad, stabilidad, integridad y paz.
A scoge e faro como scenario ya cu esaki ta nifica perseverancia, luz di speransa, para fuerte pa sigui hiba e isla pa dilanti. El a agrega cu e bandera di Aruba aworaki ta prome cu cualkier bandera politico.
RAIZ y MEP ta reconoce cu tin cu cambia e timon di e isla den un rumbo nobo. Lo bin un era nobo di politica pa biba den paz cu otro y e era aki mester cuminsa den Parlamento, e lider di RAIZ a remarca.
E puntonan di enfasis pa por yega na un acuerdo di coalicion ta: integridad, acuerdonan cu Hulanda, recuperacion economico, finansas publico balansa, desaroyo sostenibel, derechonan social, cuido di adulto mayor, muchanan, y hobennan, poniendo e ser humano central.
A bay over na firma e acuerdo y aworaki ta prematuro pa duna un timeline relaciona cu e formacion di gobierno. Esaki ta e prome stap, Wever-Croes a expresa.
