Gara 1.8 ton di cocaina recien
ORANJESTAD (AAN): Cuater siman tras di otro a canta “bingo” pa Zr.Ms. Holland. E barco Marinero Hulandes riba Diamars 24 di September, pa di 5 biaha, a intercepta un boto cu droga. Un total di 2.285 kilo di droga a keda confisca y 5 contrabandista a keda deteni.
Den oranan tempran di mainta riba Diamars 24 di September e avion patruyero Dash-8 di Wardacosta di Caribe Hulandes, a mira un boto sospechoso ta nabega den becindario di islanan ABC.
E barco Zr.Ms. Holland mesora a drenta accion, manda su botonan rapido di intercepcion den direccion di esaki y a obliga e boto pa stop, door di usa sniper pa tira y destrui motornan di e boto tipo Go-Fast.
Cinco contrabandista di droga a keda deteni y un total di 1.865 kilo di cocaina y 420 kilo di marihuana a keda confisca. E droga- y e sospechosonan a keda entrega na Wardacosta Mericano pa wordo atendi bao ley Mericano.
Zr.Ms. Holland for di cuminsamento di September ta activo como barco patruyero den region Caribe y durante operacionnan anti-droga ta traha den intercambio hunto cu US Coast Guard y Wardacosta di Caribe Hulandes. Den apenas un luna di tempo, ya Zr.Ms. Holland a confisca mas cu 7.750 kilo di droga.
