Liliana Rasmijn, Vocero Policial:
*Corda cu ta un temporada di trafico hopi druk
ORANJESTAD (AAN) – Den entrevista cu DIARIO, señora Liliana Rasmijn, vocero policial, a sigui splica tocante e uso di e-bike door di hobennan y e peligro cu esaki por trece cu ne.
Rasmijn a indica cu si e persona cu ta core riba step ta core mas recht cu ta posibel, esun cu ta riba trafico na banda mester tene cuenta si esun riba step mester haci señal pa cambia di direccion.
E ta conseha esnan cu ta core riba step pa corda uza nan man pa duna señal. “Pasobra hopi biaha nan ta cruza dilanti di auto pa bay e banda robes cu ta un peligro pa nan mes tambe. Pues, ban ta un tiki mas conciente. E ta un fenomeno, berdad! Pero mi ta kere cu den un futuro mester busca un solucion p’esaki”, Rasmijn a reitera.
El a confirma cu ta mescos cu ora un hende ta core riba bicicleta. E tin cu duna señal cu man si e ta bay banda drechi of banda robes. “Pues cuminza pon’e asina aki pa bo mesun seguridad. Corda bon cu camindanan ta druk, nos ta den temporada di fin di aña, tambe di eleccion, tin diferente actividad ta tumando lugar, unda cu por wak’e caba cu e trafico ta bira hopi mas druk. Pues si e mucha ta uz’e pa bay scol siñ'e cu ta di scol pa cas, pero no lague si e ta bay pariba di brug pay pabao di brug. Ban ta serio, no pone e mucha su bida den peligro”, Liliana Rasmijn, vocero policial a reitera y enfatiza!
