ORANJESTAD (AAN): Vocero di Cuerpo Policial, Lilliana Rasmijn a duna di conoce c'un biaha mas Cuerpo Policial conhuntamente cu DTI, Brandweer, DOW y DVG lo bay tene control pa loke ta e benta di vuurwerk.
E dianan cu ta cuminsa cu e benta di clapchi y e controlnan lo ta di 27 pa 31 di December 2021 for di ora solo sali te cu 9 pm, a indica.
Si miembronan di e team di control pasa despues di e ora ey y e lugar ta habri, e bendedor lo haya un aviso y si pasa un biaha mas y esey ta nifica cu lo kita e vergunning e momento ey.
Algo importante ta cu ta prohibi e benta di clapchi na mucha bao di 12 aña si nan no ta acompaña di un adulto.
Esnan den e container cu ta bende clapchi mester ta 16 aña bay ariba. Ta haci un yamada na tur esnan cu tin un vergunning pa bende clapchi cu mester corda cu tin reglanan mara na dje. Ademas percura pa tin un permiso valido.
Ta importante pa tin na e sitio un lugar pa paga candela . Esaki ta rekeri pa DTI y Brandweer. Mester zorg tambe ta tin un EHBO Kit (prome auxilio) pa si algo pasa. Mester percura tambe pa e container ta limpi, Rasmijn a remarca.
El a sigui bisa cu ta prohibi pa bende clapchi bieu. E controlnan ta bay basa nan mes riba e benta di clapchi di e aña prome cu e aña aki. Esey ta e fecha cu mester tin riba dje, a bisa.
Vocero di Polis a señala cu e control rutinario ta sigui y cu por pasa controla mas c' un biaha. Un bendedor cu haya un aviso, e team di control lo pasa bek pa controla si a cumpli cu tur cos manera mester ta.
