Diasabra marduga...
ORANJESTAD (AAN): E trankilidad di anochi den Koningstraat na Playa, a wordo kibra den marduga ora cu varios habitante a spierta tur spanta, door di tende sonido di tiro pafo riba caya. Yamadanan a cuminza drenta Diasabra marduga alrededor di 3:00 am na Central di Polis, raportando di a tende por lo menos dos tiro, riba e pida caya di Koningstraat na e cruzada cu Weststraat bay pabao. Algun a raporta di a mira un auto blanco sospechoso, y dos hende homber den dje lo a haci un tipo di ‘drive-by shooting’.
Esaki ta situa apenas 125 meter pariba di e Warda nobo di Polis na Playa cu ta den Paardenbaaistraat.
Inmediatamente a despacha algun unidad di Polis, cu a yega y a dicidi na cera e caya net banda di Feng Da Supermarket. E ora ey a nota cu no tabatin ningun auto ni hende mas riba caya.
Polisnan a staciona nan auto na un forma strategico, y cu hi-beam di nan headlights cendi, a cuminza baha na pia, canando poco poco nan a “peña” cautelosamente e asfalt y acera pa check si por mira huls benta abao. Enberdad den area ey a bin haya huls abao. Nan a ser laga eynan pa asina team forensico di BFTO bay saca potret y documenta tur cos.
Pero si nan wowo a cay riba un cas cu hopi biaha ta den rapportnan di Polis, y aki riba muraya a bin haya dos impacto di bala, y tambe na e cura di cas a mira manchanan di sanger. Mesora a raporta esaki na Central di Polis.
Casi 5:00 am, pues oranan laat di marduga, a bin haya sa cu un persona herida a caba di yega cu impacto di bala na Servicio di Emergencia na Hospital, y a ricibi yudanza medico. A bin haya sa despues cu e persona aki ta esun cu a ricibi tiro den Koningstraat. Polis a indica cu e victima masculino aki ta un persona di 29 aña di edad, di nacionalidad Colombiano. Su situacion ta stabil, y Recherche a core bay Hospital pa check esaki.
Cuerpo Policial a cuminza cu un investigacion, y pa sigui cu esaki ta haci un suplica na cualkier testigo cu a mira, of sa di algo loke a socede pa yama duna informacion na Tipline di Polis na 111-41. Corda cu bo por keda anonimo.
