ORANJESTAD (AAN): Tabata Diahuebs mainta prome cu 7:00 am, cu un unidad di Polis di San Nicolas a ser manda na Caya Parapete na altura di e veld di Softball pa check un situacion sospechoso.
Caya Parapete ta situa den e casnan construi na Mabon.
Ora cu Polis a yega banda di Caya Haarlem banda di 6:40 am, nan a wordo para door di un ciudadano di inicial P. Segun P. a splica, cu el a persigui e ladron di auto cu den oranan di marduga a horta e auto di su sobrina. Despues e ladron a laga e auto di su sobrina atras, y a cuminza core na pia, y el a sigui e ladron cu auto. El a bisa Polis cu e hoben a caba di bula y drenta cura di un cas na Caya Haarlem, y a bay den e cas.
E auto cu a wordo horta ta un Nissan March color roos. El a bisa Polis cu e auto mes e ladron a laga atras banda di e veld di Softball den Caya Butishi.
El a mustra Polis tambe imagen di video, unda bo ta mira e ladron hoben cu color di cuero scur, cabey preto, cu un poloshirt cora cu carson cortica estampa cu flor, y slof blauwscur di Adidas a bula e cura di cas na Caya Haarlem, y a core bay na e porta dilanti.
Polis a mira cu e dos slofnan blauwscur di Adidas, y un smartphone Samsung color preto e lo a laga cay na suela, ora cu el a bula e cura di cas. Polis a confisca nan pa cuminza investigacion.
Polis a bay despues na e veld di Softball den Caya Butishi, y aki a bin topa cu e Nissan March roos. Polis a papia cu e doño di e auto, e dama di inicial H., kende a splica cu marduga caba el a entrega keho di ladronicia di su auto.
Relaciona cu e caso aki, Polis a indica cu na tin di confisca e auto pa asina haci un investigacion extenso riba dje, pa asina team forensico tuma tur vingerprint di e ladron den e auto.
Polis a manda busca Takelwagen pa asina bay cu e auto pa asina e investigacion start door di Joyriding Team. E video a wordo poni riba un USB Memory Stick pa asina Joyriding Team por cuminza actua y detene e ladron di auto cu ta biba den Caya Haarlem.
Na final a pone Central di Polis na altura, como tambe Hefe di Servicio. Lo no dura mucho cu autoridad lo bay pone man riba e ladron di auto aki cu a spanta asina hopi te cu el a laga su smartphone y slofnan benta pafo.
