Alto Comisario Vanessa Tjon-Kock - *Violacion di toque de queda ta mara na boet di 1000 florin
ORANJESTAD (AAN): Alto Comisario Vanessa Tjon-Kock a enfatisa cu e medidanan cu a pone algun dia pasa no a yuda. Esey ta nifica cu ademas di 'alcoholverbod' (prohibicion di alcohol) riba caminda publico, tambe 'Gebiedsverbod' (prohibicion pa aglomera riba cierto areanan) y samenscholingsverbod (prohibicion riba caminda publico) nan ta keda pero nan ta wordo amplia.
Tjon-Kock a laga sa cu e ta haya hopi alarmante e uzo y abuso di alcohol. E ta kere cu ta di lamenta cu aworaki Hospital ta cuminsa sinti e efectonan y hopi grandi cu ta pidi extra atencion pa esaki.
Awe mester carga e consecuencianan di locual a tuma lugar den e dianan aki "pa asina purba scapa bida di nos cada un", Alto Comisario Tjon-Kock a manifesta.
Pa loke ta actividadnan social no ta dunando permiso pa ningun actividad social y ta haci un apelacion na cada un pa no tene actividadnan social manera fiestanan na e hogarnan pasobra esaki tambe por tin e consecuencianan di por haya confronta cu contagionan.
Ora cu Polis haya un melding pa por yega na algun sitio of casnan, Polis lo haci esaki y ta pidi e habitantenan pa coopera y stop esaki, a enfatisa.
Toque de Queda ta e medida di mas pisa cu tin. E control ta conoci caba pa cada un y e ta mara na un boet di mil florin si e persona ta wordo mira riba caminda publico entre 10 pm y 5 am.
E orario di ciere cu a cambia di 12 am pa 9 pm. Esaki tambe a bay den deliberacion cu e sector di horeca, a remarca. Esaki tin consecuencianan naturalmente pa e sector economico, pero ta medidanan cu mester a tuma di interes general na e momentonan aki, a indica.
