Presidente di SPA, señor Lito Lacle:
ORANJESTAD (AAN) A keda confirma cu riba Diamars, 2 di juni, Sindicato di Polis Aruba (SPA) a dirigi cuatro carta na Korpschef Ramon Arnhem, den cual nan a pone atencion riba cuatro tema cu, segun nan, ta importante pa bienestar y funcionamento di cuerpo policial.
Presidente di SPA, señor Lito Lacle, a indica cu tambe lo entrega copia di e cartanan na Minister di Husticia, Arthur Dowers, kende tin responsabilidad general riba e cuerpo policial di Aruba.
E prome tema ta trata e protocol di colaboracion cu Respaldo. Segun Lacle, durante un reunion cu a tuma luga diahuebs siman pasa, Respaldo a informa dirigentenan di SPA cu for di september di aña pasa nan ta intentando pa yega na un acuerdo formal cu mando policial. E meta ta pa establece un protocol pa determina con KPA y Respaldo mester colabora y comunica cu otro den situacionnan relaciona cu personanan cu problemanan di salud mental.
Lacle a indica cu te ainda no a haya ningun reaccion oficial riba e asunto aki, apesar cu Respaldo a comunica na nan cu pa mas tarda 29 di mei nan lo mester a haya respuesta. SPA a manda email na mando policial cu a manda email na Respalo informando nan cu nan no lo por duna un respuesta pa e fecha menciona, pero cu esaki lo sosode durante e siman aki.
Mientras tanto, ya siete luna a pasa desde e prome tragedia cu a tuma luga aña pasa y, segun SPA, polisnan cu ta traha riba caya ta sigui traha cu mesun insiguridad.
E di dos tema ta relaciona cu e entrega di bulletproof vests na polisnan cu ta presta servicio riba caya, segun un MB di 29 di december di aña pasa. Sin embargo, seis luna despues, SPA no a haya mas informacion tocante e proceso aki. P’esey, e sindicato ta solicitando un aclaracion di Korpschef tocante e fecha exacto cu e polisnan di straatdienst lo haya acceso na e ekiponan di proteccion.
E di tres punto ta trata e reorganizacion di cuerpo policial. Segun Lacle, un di e motibonan principal cu a scoge un korpschef cuatro aña pasa tabata pa reorganizacion di KPA. El a señala cu e ultimo reorganizacion oficial a tuma luga dia 1 di januari 2011, cu ta mas cu 15 aña pasa. Segun e, mientras sociedad y e exigencianan di trabao policial a cambia significativamente, e structura di KPA a permanece practicamente mescos. P’esey, SPA ta pidi un actualisacion tocante e estado di e proceso di reorganizacion.
E di cuatro tema ta enfoca riba e edificio di Strandpolitie. Lacle a enfatisa cu ta responsabilidad di e autoridadnan pa percura cu e facilidadnan di trabao ta den condicion optimo. El a recorda cu anteriormente tabatin un acuerdo cu e departamento lo muda pa otro ubicacion of lo construi un edificio nobo. Si esaki no ta e caso mas, SPA ta solicitando un update oficial tocante e estado actual di e proyecto.
“SPA ta solicitando contesta riba e cartanan aki pa asina nos tambe por informa nos miembornan di forma cla y transparente tocante loke ta pasando,” señor Lacle a conclui.
