Segun Dani Fernandez Perna di Sindicato SPA:
- Esey durante un reunion cu Parlamento
ORANJESTAD (AAN): Dani Fernandez Perna di Sindicato SPA a expresa preocupacion tocante e presion cu Cuerpo Policial ta enfrenta ora ta atende casonan di personanan cu comportacion dificil pa compronde y necesidad di cuido psicologico. Durante un reunion reciente cu Parlamento, SPA a elabora riba e situacionnan aki, e falta di personal y e necesidad di un lugar adecua pa ricibi y atende e personanan concerni.
Segun Fernandez Perna, e tema di e personanan cu tin mester di atencion di Respaldo a ocupa casi un ora y 15 minuut di e reunion. El a señala cu e dificultadnan cu Respaldo ta enfrenta tin un efecto directo riba e trabao policial, particularmente ora no tin un lugar adecua pa ricibi e personanan aki.
Den e situacionnan ey, segun Fernandez Perna, e responsabilidad ta termina ta cay riba KPA, mientras e cuerpo mes ta enfrenta un escasez di personal. El a enfatisa cu polisnan no ta specialista ni ta forma pa brinda e cuido cu personanan cu problemanan psicologico tin mester.
Fernandez Perna a expresa cu mester di un division cla di responsabilidad entre e organizacionnan. Segun su splicacion, Respaldo mester atende e parti di cuido, mientras polis ta atende su tareanan di asistencia y aplicacion di ley. Ora Respaldo mester interveni pa atende un pashent, e papel di polis mester ta solamente esun di brinda e apoyo necesario como autoridad policial.
El a indica cu e casonan lamentable di pasado ta subraya e urgencia pa mehora e manera cu e situacionnan aki ta wordo atende. Segun Fernandez Perna, no ta trata di solamente un of dos incidente, sino di un realidad cu polis ta enfrenta diariamente y cu tambe ta refleha den e casonan cu ta sali den prensa.
Tocante e frecuencia di e intervencionnan, el a informa cu KPA tin cifranan interno disponibel. Sin embargo, el a subraya cu ta necesario pa haya autorisacion pa presenta e informacion aki na e ministernan concerni y na Respaldo. E obhetivo ta pa mustra e dimension real di e problema y e impacto cu esaki tin riba e capacidad di Cuerpo Policial.
Segun Fernandez Perna, e cantidad di casonan ta supera dos persona pa luna. Cada intervencion ta rekeri personal policial cu, durante e periodo ey, no ta disponibel pa atende otro tarea. Como resultado, e trabao regular di e cuerpo ta acumula, aumentando e presion riba e personal disponibel.
Como parti di e buskeda di un solucion, Cuerpo Policial a sinta cu Respaldo y ImSan pa traha riba un convenio. Fernandez Perna a indica cu e expectativa ta cu e convenio por keda cla e siman aki.
No obstante, el a enfatisa cu Gobierno tambe mester contribui cu un solucion concreto, particularmente door di busca un lugar adecua pa ricibi y atende e personanan concerni. Segun su declaracion, aunke tin personal disponibel (cu ainda no ta suficiente), e falta di un lugar apropia ta sigui ta un di e obstaculonan principal.
SPA ta considera cu coordinacion entre e instancianan, claridad den responsabilidadnan y disponibilidad di un lugar adecua ta esencial pa mehora e atencion na e personanan cu tin mester di cuido y, na mes momento, alivia e presion riba Cuerpo Policial.
