Dos hende local deteni
- A bin haya arma di candela cu municion di caliber halto
ORANJESYAD (AAN): Riba Diabierna mainta, habitantenan na Dakota a nota presencia fuerte di unidadnan di polis den un caya.
Vocero di Polis, Liliana Rasmijn, posteriormente a confirma cu ta agentenan di ‘Unit Narcotica’ a tene un razzia na un cas den Caya Juancho Kock.
E accion aki a wordo haci cu bendicion di Ministerio Publico, cu a aproba e entrada hudicial a base di monton di prueba cu autoridadnan a logra acumula, y den e caso aki ta relaciona cu un carga cu droga scondi y cu a wordo intercepta na Aruba.
Autoridadnan a yega na un forma sorprendente, a blokea caya, y keda vigila tur rond di cas, y hasta cera e meter di awa. Asina a drenta e cas durante e razzia y sorprende esnan cu ta eyden e momento aki.
Polis a bisa cu durante e entrada hudicial a detene 2 hende homber di inicial J.I.V. di 50 aña naci na Aruba, tambe J.R.V. di 19 aña naci na Aruba.
Durante e razzia, a ristra den henter e cas. Durante e buskeda aki, Unit Narcotica a confisca un arma di candela y a bin haya municionnan di diferente caliber, incluyendo algun di caliber halto. Pues e hendenan aki tin hopi cos mas di bay duna splicacion.
Na e accion diferente departamento policial a forma parti di dje entre otro Flex Team, Arrestatie Team, K9 Unit y Polis uniforma di Oranjestad. Nan a laga e caya cera te ora cu a keda cla cu e buskeda y detencion.
Si acaso abo como ciudadano tin informacion adicional di e caso aki pa autoridad, anto Cuerpo Policial Aruba ta haci un suplica pa drenta den contacto cu nan. Si bo sa algo of a mira algo, por yama e Tipline di Polis na 111-41 y corda cu nan ta garantiza cu bo ta keda anonimo.
Investigacion den e caso aki ta sigui.
