Presidente di SPA, Rodney Solognier:
- ‘Mi a pronostica den pasado cu e dia aki lo yega’
ORANJESTAD (AAN) Presidente di Sindicato di Polis (SPA), kier a trece dilanti na conocimento di comunidad, e siguiente relato, pa trankilidad di tur hende, tocante loke a sosode Diamars cu a pasa na Pos Abao.
Locual a pasa Diamars atardi na Pos Abao cu pashent di Respaldo, ta algo cu KPA ta lamenta masha hopi mes, y como polis y empleado publico cu nan ta, nan ta busca manera di ta amigo di pueblo di Aruba, nan ta sinti mescos cu nos comunidad.
“Esaki ta algo cu no mester a pasa, nos ta pensa cu por tabata tin otro motibo, pero nos kier trece dilanti cu nos tin hendenan capacita den nos aparato gubernamental, cu eigenlijk mester a tuma e prome paso, prome cu polis bin”, Solognier a declara.
Solognier a subraya cu eyden nan tin Crisis Team, HUNTO, y Respaldo logicamente.
El a señala cu e por a compronde cu Respaldo a haci un fout di maneho, pa cu e pashent concerni, den principio.
“Mi kier a laga bosonan tambe cu ora cos ta bay for di sla polis ta yega. Lamentablemente, e situacion aki a bay for di man, y nos no por yuda cu esey”, Solognier a señala.
El a subraya cu loke nan a trece dilanti cu gobierno anterior, nan a trece dilanti tambe cu gobierno actual, cu mester activa e instancianan concerni pa e personanan cu tin problema di salud mental.
“Realmente, e no ta nos trabao. Nos trabao ta cu hendenan cu ta comete actonan criminal, y asuntonan contra husticia. E hendenan aki, den su mayoria, ta personanan cu no por yuda den e forma con nan ta traha of nan ta move. E hendenan aki mester wordo atendi diferente pa cu locual por a pasa Diamars”, Rodney Solognier, lider di SPA a bisa.
E ta pidi gobierno actual pa haci lo mas posibel pa departamento of instancianan cu el a menciona por wordo activa mas pronto posibel, pasobra ta wordo papia rond, cu nan no ta traha manera mester ta.
“Tur hende aworaki ta volg loke polis a haci, pero ningun hende ta volg loke, eigenlijk, por a pasa. E persona aki mester a wordo trata y atendi, door di e departamentonan cu mi a menciona: Crisis Team, Hunto, Respaldo tambe. Nan mester a zorg pa e persona aki”, Solognier a enfatiza.
El a vocifera cu Polis no por sigui handle cu hendenan mentalmente problematico. “Nos por corda tambe den pasado kico a pasa caba cu un colega di nos. Den e caso aki no a bay manera biaha pasa, y aworaki el a bira un problema”, Rodney Solognier a remarca.
El a agrega cu su persona como presidente di SPA a trece esaki hopi biaha dilanti, y el a pronostica e dia cu a pasa, y den pasado a bisa e ministernan cu e dia aki lo yega.
