Robby Rosel di Bureau City Inspector:
ORANJESTAD (AAN): Vocero di Bureau City Inspector, Robby Rosel, a trece dilanti, den entrevista cu DIARIO, un tema hopi importante pa loke ta e temporada di fin di aña.
El a señala cu e temporada di fiesta ta yegando y sigur por tuma nota di hopi sushedad cant'i caminda y hopi pickup, truck cu ta core sin lona pa cubri e sushedad. Esaki ta algo cu ta para den Articulo 16 cu ta bisa cu por haya un boet pa esaki mirando cu sushedad no por keda atras.
No ta permiti esey y mester tin un lona pa tapa e sushedad, a remarca.
Den e dianan aki tin hopi sushedad ariba caya cu ta birando di mas. Tur ora ta papia riba dje, pero parce cu e mensahe no kier yega den oido di comunidad of nan no kier tende di esaki. Ta yega e momento cu ya caba, diabierna a tuma contacto cu Cuerpo Policial pa nan por cuminsa pone mas atencion riba esaki, Rosel a splica, pa por cuminsa reparti boetnan pa esnan cu ta core sin e lona.
Esnan cu ta transporta sushi pa dump no mester lubida cu mester pone un lona. Den caso cu Polis haya bo sin lona bo lo haya un multa di biaha, a bisa.
Cualkier persona cu ta riba caminda na Aruba y cu ta mira situacionnan asina, ya sea pick, truck, trailernan cu ta transporta sushedad manera piedra, mata, frigidair, etc, tur mester wordo tapa. Y si nan no ta wordo tapa e chauffeur lo haya su boet, Robby Rosel a indica.
Cualkier persona por yama BCI na 582-9777 of por subi riba Fixi cual ta un sistema nobo. E app aki por download, subi riba dje y manda un potret, cu e number di e auto cu kier raporta. BCI lo traha riba esaki pa por yega cerca di nan.
Bureau City Inspector kier bolbe haci un suplica na comunidad di Aruba pa mantene Aruba limpi.
