ORANJESTAD (AAN): Durante un razzia, autoridadnan local a sa di intercepta hopi marihuana, y tambe a detene un persona.
E asina yama PTD (Project Team Drugspanden) ta un team cu a worde lanta pa entre otro investiga bendemento di droga for di casnan, y a base di investigacion nan bista a cay riba un adres den Tarabana.
En conexion cu un investigacion andando, Project Team Drugspanden a bay na un cas na Macubaristraat y a detene e homber di inicialnan F.S.G. di 59 aña naci na Aruba.
Vocero Policial a confirma cu durante e entrada hudicial a confisca un cantidad di marihuana.
Diferente team special manera: K9-unit, departamento tecnico di Cuerpo Policial y otro teamnan tambe a participa na e entrada hudicial aki.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama e tipline 111-41. Nan ta garantisa cu bo ta keda anonimo.
