ORANJESTAD (AAN): Keto bay reglanan y protocolnan pa mitiga e brote di Coronavirus ta valido na Aruba!
Gobierno a suavisa regla un poco y cambio horario di cierre y elimina Toque de Queda. Sinembargo toch e Decreto Ministerial ta keda valido.
Pero ta parce cu tin algun hende cu ta bebe y lubida tur e reglanan aki. Na cuminza aglomera riba otro, ta papia cerca di otro hende pasobra musica ta duro, y tur esey ta condicion ideal pa e virus sigui plama.
Den fin di siman cu a pasa, durante un control di e Taskforce combinacion cu Polis cu ta traha na e Departamento di Sectie Bijzonder Verordening (SBV) di distrito di Noord, a eherce diferente controlnan riba negoshinan den horeca y a bin topa cu situacionan na algun Bar cu no por permiti.
Diasabra anochi, e Departamento di SBV Noord a tene control y nan a haya nan obliga na duna ordo di cierre inmediatamente y duna multa na varios negoshi.
Na a establecimento di ‘La Oficina Bar’ na Tanki Flip, a constata Hendenan sinta y para na bar. Empleado trahando sin tapaboca bisti. Hendenan para ta bebe, ta cana sin rond sin tapaboca y baliando. Nan tabata balia sin cu ningun hende di gerencia ta stop nan. Wel nan a haya un multa y procesverbaal a wordo traha. A ordena doño pa cera porta y saca tur hende afo.
Na e establecimento Yen Yen Bar & Restaurant na Kamay, a constata hendenan sinta y para na bar. Hende ta para na mesa no tin stoel. Hendenan canando rond den e dicho bar sin tapaboca. Musica na un volumen halto. Aki tambe nan a haya un multa y procesverbaal a wordo traha. A ordena doño pa cera porta y a saca tur hende afo.
Na e establecimento Lekker Bar & Restaurant na Noord, a constata hopi hende den e lugar no tin mesa, tur ta para. Empleado trahando sin tapaboca. Ora di wak rond, a mira cu ningun cliente den e lugar tabatin tapaboca. Musica na un volumen halto. Aki tambe nan a haya multa y procesverbaal a wordo traha. A ordena doño pa cera porta y a saca tur cliente afo.
Vocero Policial a confirma na DIARIO, cu nan lo sigui controla diferente establecimentonan rond di nos isla. Percura pa abo ta cumpli cu e reglanan. E potret aki ta uno di archivo.
