Agentenan a mira cu tur cos ta OK eynan
ORANJESTAD (AAN): Un diferencia di opinion notable ta loke por a observa Dialuna anochi. Y ta indicativo cu personal di Taskforce di DVG tin di bay cuminza revisa nan sistema di eherce control.
Dialuna anochi e Taskforce di DVG tabata actua hopi raro. Nan a ricibi un avalancha di critica pa e forma cu nan a atende nos grandinan cu ta baliando cu nan propio pareha na Djiespie’s Place. Critica eynan ta sigui keto bay.
Y awor ta bin haya sa cu tabatin na otro lugar tambe e anochi ey, unda Taskforce di DVG tabata tuma decisionnan iracional, y hasta cuestionable.
Un rapport oficial di Polis di Noord, ta menciona cu Dialuna anochi banda di 10:45 pm, nan a haya ordo pa bay duna sosten na e Taskforce di DVG cu ta controlando Sand Bar na Palm Beach.
Polis a yega y papia cu un persona di DVG. E cabayero a bisa agentenan cu nan a caba di haci control na Sand Bar y a constata algun violacion di e Decreto Ministerial nobo. E persona di Taskforce a pidi cooperacion pa bay bek paden como sosten.
Pero ora cu Polis a drenta den Sand Bar, e agentenan a ripara cu tur cos ta bon organiza eyden. Tur hende ta para na nan mesa, y tur mesa ta poni na un distancia for di otro.
Como 25 minuut despues, esta pa 11:10 pm, e personal di DVG a tuma e decision cu nan ta bay cera Sand Bar. Despues cu nan a pone e doño di e negoshi na altura di loke nan a constata y di e actonan di incumplimento, nan a bin cerca Polis y a exigi di e agentenan pa bay cera Sand Bar y duna nan un proces verbaal tambe.
Pero Polisnan no tabata di acuerdo cu esaki, pasobra loke nan a bin tende na comienzo di DVG cu nan lo a constata, no ta loke e agentenan mes a mira.
Como cu Polis ta haya cu Sand Bar ta bon organiza y bao di control, e agentenan a dicidi pa informa esnan di Taskforce di DVG cu Polis lo NO cera e lugar. Nan a bisa Taskforce cu e negoshi ta cumpliendo cu tur regla den nan bista.
Tambe a bay bisa e doño di Sand Bar cu Polis no ta cera e lugar, pasobra nan ta mira cu tur cos ta bao control y cu no tin hopi aglomeracion. Pues e lugar por keda habri bao di e condicion cu nan tin di cera na tempo, y sigui vigila e reglanan di DVG.
Pues Taskforce a baha bay di eynan boca cera.
Polis a notifica nan Hefe di Servicio, y tambe Central di Polis.
Mas despues ora Polis a pasa, nan a bin nota cu Sand Bar a cera na tempo y tur hende a bay cas.
